КъБР-м и Iэтащхьэ КIуэкIуэ Казбек курыт школыр къэ­зы­уххэм гуапэу ехъуэхъуащ, мы махуэхэм республикэм къы­зэрыщIагъэкI гуфIэгъуэ пшыхьхэр зэрыщекIуэкIым щхьэкIэ. 

«ГъащIэм мыхьэнэшхуэ щызиIэ лъэхъэнэщ иджыпсту фызэрытыр. Фэ зэпыфчащ япэу уэзджынэр къыщыфхуеуам къы­щыщIэдзауэ аттестатыр къыватыжыным нэс къызэ­щIэ­зыубыдэ гъуэгуанэ кIыхь, Iуэхугъуэ хьэлэмэтхэмрэ купщIафIэ­хэмкIэ гъэнщIауэ. Курыт школыр къэзыуххэм, абыхэм я егъэджакIуэхэм, адэ-анэхэм сигуми си псэми къабгъэдэкIыу со­хъуэхъу а къэхъукъащIэ дахэмкIэ. 
Нобэ фызытехьэ гъуэгуанэщIэм щызыIэрывгъэхьэну ехъу­лIэ­ныгъэхэм лъабжьэ яхуэхъунур школ илъэсхэм зэвгъэгъуэта щIэ­ныгъэхэращ, зэфIэкIхэращ. Дэтхэнэми фиIэжщ мурадхэмрэ ­хъуэпсапIэхэмрэ. Фэ зи щIалэгъуэхэм фи зыужьыныгъэм хуэгъэпса Iэмал куэдыщэ щыщыIэщ нобэ ди къэралым. Абыхэм ящыщу сыт хуэдэ унэтIыныгъэр къыхэвмыхми, ар щIэныгъэм пыщэн е лэжьыгъэ IэнатIэм пэрыувэн ирехъу, нэхъыщхьэр фи мурадхэм фалъэIэсу, цIыхухэм сэбэп фахуэхъуу фыпсэунырщ. Ерыщу фыхуэкIуэ фи мурадхэм, факъыпимыкIуэт лъэпощхьэ­похэм. ИтIанэщ фи хъуэпсапIэхэр нахуапIэ щыфхуэщIынур. 
Ди Къэбэрдей-Балъкъэрым, фIыуэ тлъагъу Урысейм я къэкIуэнур зыухуэнур фэращ. Си фIэщ мэхъу фи хъыбарыфIхэр зэман кIэщIым къриубыдэу къызэрыIунур, фэ къэрал зыужьыныгъэм хуэфщIа хэлъхьэныгъэхэм дызэрыригушхуэнур. 
Узыншагъэ быдэ, зэпэщыныгъэ фиIэну, зи щIалэгъуэхэ. Фи ­мурадыфI псоми фалъэIэсыну. 
Гъуэгу махуэ фытехьэну, курыт школыр къэзыуххэ!» - къы­хегъэщ КIуэкIуэ Казбек и хъуэхъу псалъэм.