Тиширыу не заманда да жашлай турургъа, саны, сыфаты да ариу болуп турса сюйгени баямды. Аны бла байламлы кёп тюрлю амалла да къураладыла. Бюгюнлюкде эм белгилиледен а косметология бла целлюлитни кетерген массажды. Аны къаллай энчиликлери болгъаныны юсюнден бу бёлюмде талай заманны ишлеген Гузойланы Алима бла ушакъ этгенбиз.

- Алима, сен сабий садда ишлейсе, массаж этген ишни бардырыргъа уа къалай бла кёлленнгенсе? 

- Кертисин айтханда, хар тиширыуну да ариу болуп турурун сюйгенден.  Билгенибизча, тиширыу юйленнгенинден сора, гитче сабийлери болса, аланы жумушлары бла кесине сюйгенича уллу эс буралмай къалады. Жарсыугъа, кёпле семирип башлайдыла, ол а, бек алгъа, саулукъгъа иги тюйюлдю. Мен да аллай кезиуюмден сора, кесими къолгъа жыяргъа кереклилени ангылап, ашыма, сууума да уллу эс буруп, массаж этген бёлюмде билим алыргъа кёлленнгенме. Массаж этгенден сора да, тиширыула бла психология жаны бла ушакъ этиучюме, кеслерини саулукъларына, сыфатларына да сакъ болургъа да чакъыргъанлай турама. 

Бу бизни миллетге артыкъ керек болмагъан темады деген да терсди. Нек дегенде бизни ынналарыбыз не заманда да субай болгъандыла. Семизлик хазна болгъан да этмегенди, ол айыпха саналгъанды. Бюгюнлюкде аладан къалгъан беллерине салгъан кямарлагъа къарасанг, сейир этесе, нечик субай адамла болгъандыла ала деп. Аны себепли биз да эм алгъа, модадан угъай, аладан юлгю алыргъа керекбиз.

- Юйреннген а къайда этгенсе массажны бу тюрлюсюне? Бизни республикада аны бла байламлы билим берген специалистле кёпмюдюле?

- Бюгюнлюкде мында да бардыла ол жаны бла юйретгенле, алай кёп тюйюлдюле. Мен Дагъыстанда окъугъанма, нек дегенде бьюти сфера жаны бла анда тыш къыраллада юйренип келген терен билимли специалистле бардыла, ангылатхан да иги этедиле.

- Хар усталыкъны да кесини энчилиги барды, сени оюмунга кёре, массаж этгенде эм къыйын не зат болады?

- Бу ишде манга къыйын жангыз бир зат болады – келген къызла сени айтханынгы эшитмеселе. Нек дегенде мен айтханланы этип турсала, ала бла ишлеген тынч эм хайырлы болады. Бир-бирле уа, жарсыугъа, жангыз массаж бла ариу болуп къалаллыкъ сунадалы, айтханынга да уллу эс бурмайдыла. Эм алгъа массажгъа, бютюнда быллай тюрлюсюне, келирден алгъа эки сагъатны ашаргъа жарамайды, алай болмаса, массаж этген кезиуде, аш орунуна ауурлукъ болуп, кёлю аман этип башлайды. Сора процедурадан сора да бир-эки сагъатны кесин ашдан сакъласа игирек болады.

- Сора быллай массажны хайыры бла бир айгъа ненча килограмм кетерге боллукъду?

- Бир айны ичинде, хар затны да айтханымча этип турсала, беш-сегиз килограммны кетерген къыйын тюйюлдю, аны бла бирге уа белинден да сегиз сантиметр чакълы кетерге боллукъду. Алай, айтханымча, адам жангыз массажгъа ышанып, ингирде уа аямагъанлай ауур азыкъла ашап неда бусагъада кёпле сюйген саулукъгъа хата келтирген татлы газ сууланы ичип турса, андан магъана болмайды неда ол айны ичинде кетген килограммлары экинчи айгъа бек терк къайтып къаладыла. Аны ючюн адам эм алгъа кеси сакъ болургъа керекди аллай энчиликлеге. Жангыз массажгъа жюрюп, спорт бла кюрешмегенлей, фаст-фуд ашап арыкъ болурбуз деп ышанмагъыз.

Ол адамны терисине бютюнда аман, къыйын да болады. Массажны хайыры бла териси тап бола тургъанлай, ашха ычхынып къалса, алгъадан эсе бек семирирге да болады.

- Массаж этген бек арытады дейдиле, сен бу оюмгъа не дейсе?

- Бир кюннге беш-алты къызны алама, къыйналгъан да этмейме. Арыгъанла да бола болурла, алай мен адамгъа массаж этип, сыфатын ариу эталлыгъыма къууаннган, кёлленнген да этеме. Амалым болса эди, хар тиширыуну да кесине сакъ болургъа чакъырып, санын ариу этерге сюерик эдим. Аны себепли хар келгеннге да хайыр эталгъанымы ангылап, арыгъан угъай къууаннган этеме.

- Алима, хар тиширыу да ариу болургъа сюе болур, алай саулукъ жаны бла бу массажны этмезге сылтаула уа бармыдыла?

- Хау, жарсыугъа, аллай энчилиги да барды. Аягъында тамырлары, жюреги къыйнагъан, сора онкологиясы болгъан адамлагъа жарамайды. Сора келгенни къан басымы уллуму огъесе гитчеми болады, ол энчиликге да массаж этерни аллында эс бурмагъанлай жарамайды. Массаж анга кёре эки тюрлю этиледи.

Сора териде сепкиллеге да сакъ болургъа керекди, ала уллу болсала, аланы юслеринден басаргъа жарамайды. Белгилисича, массажда тюрлю-тюрлю аппаратла бла хайырланама. Аланы да кеслерини энчиликлери барды, жюрек ауруулары болгъан адамлагъа аллайла келишмейдиле.

- Бир-бирлеге тынгыласанг, массаждан сора къыйналгъанларын  айтадыла. Ол алай болургъа керекмиди?

- Угъай, массажны къаллай тюрлюсю да адамны саулугъуна хайыр келтирир ючюн этиледи. Массаж этген кезиуде хау билинеди, алай андан сора уа санынг тюйюлгенча угъай, спорт залда тренировка этгенча, шаугютлеринг алай билдирирге керекдиле.  Бек къаты басып, этни къаралтхан неда асыры ийлегенден жара этген, ол массаж болмайды.

- Массаж этгенде бал бла да хайырланаса, андан сора да, исси эм сууукъ чулгъаныу барды. Ала уа не хайыр бередиле эмда энчиликлери недеди?

- Массажны бу тюрлюсюнде бал бек кереклиди. Курсну ичинде бал бла юч кере массаж этилсе, ол терини ариу этеди. Сора целлюлитни да кетерирге иги болушады, саулукъгъа да хайыры уллуду. Исси чулгъаныу а терини тюбюнде жауну эритирге иги болушады. Терини тюбюнде чыкъгъан жау массаж бла иги кетмесе, аны бла хайырланама. Ол иги эритеди, аны себепли тиширыуну бели да иничкерек болады. Сора сууукъ чулгъаныу а, иссича, жауну кетергенинден сора да, терини ариу эм сыйдам этеди. Андан сора да, аллай маскаланы тюрлюлери асламдылда, ала бла аз-аздан хайырланыучума.

- Быллай массажгъа барыргъа сюйген тиширыулагъа не зат айтыргъа сюесе?

- Эм алгъа массажист айтхан эсгертиулени этигиз. Ол сизни саулугъугъузгъа иги себеплик этерикди. Ары жюрюрге сюйгенлеге, бармагъанлагъа да айтырыгъым ашыгъызгъа сакъ болугъуз. Адамны сыфаты, териси да тюз ашамагъанындан бузулады, теркирек къартаяды. Бютюнда шёндюгю татлыланы хайырларындан эсе хаталары кёбюрек болады. Аны ючюн адам ашындан аны кетирип къойса, бютюн иги боллукъду. Дагъыда огъарыда сагъыннганымча, газы болгъан татлы суула адамны сыфатын бек бузгъанларын эсде тутсала сюеме. Аны себепли хар адамыбызгъа да саулукъ тежейме.

Ушакъны Темуккуланы Амина бардыргъанды.