КъМР-ни Башчысы Казбек Коков «РТ-Развитие бизнеса» (Ростех) компанияны таматасыны биринчи орунбасары Андрей Захаров, «Эльбрусметаллны» таматасы Евгений Балуков, инвесторланы къауумуну келечилери бла тюбешгенди.
Ала СКФО-да тау-металлургия проектни жашауда бардырыуну, Тырныауузда магъадан чыгъарылгъан жерде вольфрамны бла молибденни къазыуну жангыртыуну юсюнден сёлешгендиле. Инвесторла проектни къоркъууларын кетериу эмда къыйматлылыгъын кётюрюу жумушланы тамамлагъанлай турадыла, магъадан чыгъарылгъан жерни геология юлгюсю тинтиледи эмда  Минерал сырьёну Н.М. Федоровский атлы илму-тинтиу институту бла байламлыкъда магъаданны байыкъландырыу технологияла жаны бла илму тинтиуле бардырадыла. Ол жумушла тарых хазна, бийикликледе жер тюбюнде къазыуланы энчилиги, продукцияны сатыу эмда кредит финансированияны багъасы жаны бла магъадан чыгъарылгъан жерни хайырлылыгъын кётюрюрге бурулупдула. 
Эсигизге салайыкъ, Ростех Госкорпорация Россейни машинала ишлеген уллу компаниясыды, гособоронзаказны чеклеринде сауутланы, аскер эмда энчи техниканы баш поставщигиди, ол къыралгъа стратегиялы магъаналы бёлюмледе бийик технологиялы граждан производстволаны айнытады.
Тюбешиуню эсеплерине кёре КъМР-ни Башчысы Казбек Коков былай айтханды: «Посланияда мен инвестиция иш бизге бек магъаналы болгъанын белгилегенме, анга ол санда бийик технология проектле да киредиле. Тау-металлургия комбинатны къурагъанда шёндюгюлю эм инновация технологияла хайырланырыкъдыла. Проект ёсгенди эмда кластер халлы болгъанды. Аны жашауда бардырыу россей промышленностьну вольфрамы болгъан сырьё жаны бла битеу ич излемлерин жабаргъа онг берликди».