Парламентни жетинчи чакъырылыууна депутатланы айырыу бла байламлы Къабарты-Малкъарны Жамауат палатасы «Единая Россия», ЛДПР, «Справедливая Россия» политика партияланы регионда бёлюмлери эм республиканы муниципал къуралыуларында жамауат палатала бла бирге ишлеуню юсюнден келишимле тауусханды.
Палатаны башчысы Хазратали Бердов билдиргенича, 8 сентябрьде айырыула бузукъсуз ётерлерине къарарыкъ жамауат штаб ишин башлайды. Палатаны бу жаны бла сынамы уллуду, Россейни Президенти айырыуда да жамауат штаб салыннган борчланы тынгылы толтургъан эди. Бу жол да ол палатаны мурдорунда къуралгъанды, ишини планы бегитилгенди.
Штабха башчылыкъны палатаны граждан обществону институтларын айнытыу, миллетле эм динле аралы халланы игилендириу, коммерциялы болмагъан секторгъа себеплик этиу жаны бла комиссиясыны таматасы Николай Маслов этеди. Аны къауумуна запасда офицерлени «Мегапир» ассоциацияларыны регион бёлюмюню башчысы Атайланы Жашарбек, палатаны келечилери Доти Бажев, Къараланы Расул, Роман Литвинов, Юлия Ордокова, Карина Пафифова, Жамауат къараучу комиссияны башчысы Анатолий Барсагов, палатаны аппаратыны башчысы Анна Дьяченко, китап окъургъа сюйгенлени биригиулерини башчысы Наталья Шинкарева, «Единая Россия» партияны регионда бёлюмюню толтуруучу комитетини башчысыны орунбасары Марина Шогенова, аскер къазауатланы ветераны «Ата журтну къоруулаучулары» фондну республикада бёлюмюню башчысы Чеченланы Элдар киргендиле. Айырыуланы кезиуюнде эм алагъа хазырланнган заманда чыкъгъан право жаны бла соруулагъа эм да башха даулашлы болумлагъа эксперт къауум къарарыкъды. Айырыу участкалада билмей тургъанлай чыкъгъан болумланы тамамларча мобильный къауум хазырлылыкъда турлукъду, пресса ара уа жангылыкъланы билдирликди.
Ызы бла «Хорламны келтиргенле» проектни бардырыуну юсюнден соруу кётюрюлгенди. Хазратали Александрович аны юсюнден районланы администрациялары бла сёлешиннгенин, ала кеслерини жанындан не тюрлю болушлукъ этерге хазыр болгъанларын билдиргенди. «Районлада палатала бу ишни не къадар тынгылы бардырыргъа, хар юйюрге тюбеп, аланы тукъумдан урушха къатышхан адамларыны юсюнден информацияны жыяргъа керекдиле: аты, тукъуму, урушха къачан чакъырылгъаны, майдаллары неда башха саугъалары, къайда ёлгени, сау къалгъан эсе, мамырлыкъ тохташханда не бла кюрешгени. Администрациялада архивле бардыла, ала бла да хайырланыгъыз. Бу иш Уллу Хорламны 80-жыллыгъына толтурулургъа керекди», – дегенди.
Проектни башламчысы Уллу Ату журт урушну музейиди. Юлия Ордокова айтханыча, регионну Цифралы айныуну министерствосу бла бирге цифралы тизме къуралып, урушха къатышхан хар инсанны аты, аны юсюнден шартла анда сакъланырыкъдыла. Юлия Валерьевна хар юйюрню да бу ишге тири къатышыргъа чакъыргъанды. Нек дегенде Ата журт урушха аталгъан сайтлада республикабызны кёп жигитлерини атлары жазылмагъандыла, бу проект а ол ол кемчиликни кетерирге болушурукъду.
Кульчаланы Зульфия.
Сурат авторнуду
