1941 - 1945 гъэхэм екIуэкIа Хэку зауэшхуэм зэрыщIидзэрэ илъэс 83-рэ щрикъу махуэм  екIуэкIа «Фэеплъ уэздыгъэ» лIыхъужьыгъэ-хэкупсэ акцэм хэтащ КъБР-м  щыIэ МВД-м и лэжьакIуэхэмрэ ветеранхэмрэ.

 Абы кърихьэлIащ республикэм щыIэ МВД-м дэлажьэ Жылагъуэ советым щыщхэу Мэкъушэ Русланрэ Бобылев Валентинрэ.

 Къэрал кIуэцI IуэхухэмкIэ министру КъБР-м щыIэм и къалэнхэр пIалъэкIэ зыгъэзащIэ, полицэм и полковник  Мамхэгъ Назир къызэхуэсахэр къыхуриджащ ди Хэкур яхъумэу зи гъащIэр зытахэр  ящымыгъупщэну.

- Ди щхьэр яхудогъэщхъ лIыгъэ зезыхьахэм. Ди адэхэм, адэшхуэхэм я гъащIэм емыблэжу Урысейр кърагъэлащ. Дэ сыт щыгъуи ди гум илъынущ абыхэм я лIыгъэр.  Нобэ лъэпкъ куэду зэхэт ди цIыхухэм  аргуэру къагъэлъагъуэ лIыгъэрэ щIыхьрэ.  Урысейм и дзэ къулыкъущIэхэмрэ  добровольцхэмрэ  я щIыр яхъумэ, пэжагъым щIэбэну.  Дэ къытхуагъэува лъагапIэр зыIэщIэдгъэкIыну дыхуиткъым.  Нобэ дэ дотх дуней псом и тхыдэщIэ. Мамырыгъэ щыIэн хуейщ, лъэпкъ зэхэгъэж, пцIырэ хьилагъэрэ хэмылъу. Фи фIэщ фщIы ди къару псори зэретхьэлIэнур ди Хэкум и ефIэкIуэныгъэм, - къыхигъэщащ Мамхэгъ Назир.      

Къызэхуэсахэр Хэку зауэшхуэм  хэкIуэда лIыхъужьхэм я фэеплъым пщIэ хуащIу, дакъикъэкIэ щымащ.   

Республикэм ис Муслъымэнхэм я дин  IуэхущIапIэм и  тхьэмадэм и къуэдзэ Джэдгъэф Аслъэн Хэку зауэшхуэм и илъэсхэм хэкIуэдахэм  папщIэ дыуэ яригъэщIащ, Налшык къалэм,  Псыхуабэ, Черкесск епархием и благочиннэ, КъБР-м щыIэ МВД-м и Жылагъуэ советым хэт Бобылев Валентин тхьэ яхуелъэIуащ. 

Апхуэдэуи къызэхуэсахэм  зыхуагъэзащ Мэкъушэ Русланрэ КъБР-м  къэрал кIуэцI IуэхухэмкIэ и органхэм я ветеранхэм я жылагъуэ зэгухьэныгъэм и тхьэмадэ Пыхъ МуIэедрэ.  

         АдэкIэ полицэм и кадет классым щеджэхэм шэху уэздыгъэ пыгъэнар Мамхэгъ Назир IэщIалъхьащ.

         Зауэ губгъуэхэм  щыхэкIуэдахэм я фэеплъ нэхум пщIэ хуащIу  къызэхуэсахэм шэху уэздыгъэхэр пагъанэри, хабзэхъумэ зауэлI хэкIуэдахэм я фэеплъым деж удз гъэгъахэр щагъэтIылъащ.

                                                         ДЫГУЛЫБГЪУ Жантинэ.