РФ-ни МЧС-ини жол-транспорт аварияланы кезиулеринде адамлагъа  болушлукъ тапдырыу жаны бла эришиулери быйыл бла 15-чи кере бардырыладыла. Быйыл ала Уфа шахарда ётгендиле. Анга къыралны 12 регионну командасы къатышхандыла. Ол санда Элбрусну бийик тау-излеу-къутхарыу отрядны келечилери да.

«Уфа-Аренада» ётген эришиуледе 100-ге жууукъ къутхарыучу кеслерини хазырлыкъларын кёргюзтгендиле. Бу ишлеге шахарчыланы сейирлери да уллу эди. Конкурсха деп хазырланнган таурухха кёре, жолда юч автомобиль авариягъа тюшедиле. Биринде водитель эм аны биргесине болгъан экеуленни жанларына къоркъуу барды. Къутхарыучулагъа аланы не къадар терк чыгъарып, болушлукъ тапдырыргъа керекди. Аны бла бирге экинчи машина да жанып башлайды. Анга да ала тийишили эс бёлюп, ёчюлтюрге керекдиле. Битеу белгиленнген ишлеге 40 минут берилгенди. Ол заманнга сыйынмагъан командалагъа тазир балла къошулгъандыла.

   Бизни регионну келечилери автомобильни кесип, салыннган борчланы 32 минутха толтургъандыла. Алай, жарсыугъа, ол заман алагъа саугъаланнганланы къауумуна тюшер онг бермегенди. Бек кючлюле уа бу жолгъу эришиуде Челябинск областьны келечилери болгъандыла. Келир жыл къутхарыучулагъа къонакъбайлыкъ да ала этерикдиле.

Аланы ызларындан Красноярск крайны бла Москваны командалары орналгъандыла. Ала бары да майдалла эм сыйлы саугъала бла белгиленнгендиле.

Къасымланы Аминат.