Къэбэрдей-Балъкъэрым и Урысей гвардием и лэжьакIуэхэри хэтащ щIыналъэм и щыхьэрым, ХьэтIохъущокъуэм и жыг хадэм деж  щекIуэкIа «Фэеплъ уэздыгъэ» урысейпсо акцэм.

Абы кърихьэлIащ Урысей гвардием и щIыналъэ управленэм  дэлажьэ Жылагъуэ советым и унафэщI, полицэм и полковникыу отставкэм щыIэ Хужьокъуэ Руслан, щIыналъэ органым и гупыр, республикэм и унафэщIхэм, ветеран IуэхущIапIэхэм, хабзэхъумэ органхэм я лIыкIуэхэр, юнармейцхэмрэ къалэдэсхэмрэ. 

 Къызэхуэсахэм захуигъэзащ Налшык къалэм Зауэм, лэжьыгъэм, IэщэкIэ ЗэщIэузэда Къарухэмрэ хабзэхъумэ органхэмрэ я ветеранхэм я советым и унафэщI Абдуллаев Мустэфа  икIи къызэхуэсахэр къыхуриджащ Хэкур зыхъумахэм я фэеплъыр зэи ящымыгъупщэну.

Акцэм хэтхэм  шэху уэздыгъэхэр пагъанэри, Хэку зауэшхуэм и илъэсхэм хэкIуэда лIыхъужьхэм я фэеплъым пщIэ хуащIу дакъикъэкIэ щымащ, удз гъэгъахэр щагъэтIылъащ «Фэеплъым и МафIэ мыужьых» мемориалым деж.

- ЦIыху мелуан пщIы бжыгъэхэм я гъащIэр зыхьа  Хэку зауэшхуэр напэкIуэцI гуузу, тщымыгъупщэу къыддекIуэкIынущ. Ди цIыхухэм зэрахьа лIыгъэр, ди Хэкум игъэва гугъуехьхэр тщыгъупщэ хъунукъым. ЛIыхъужьхэм я фэеплъыр мыкIуэдыжынщ! Зыри тщыгъупщакъым! -  жиIащ  полицэм и  майор Лыкъуэжь  Маринэ.      

                                                                                     УАРДЭ     Жантинэ.