Аскер искусстволаны тёрели битеуроссей эм жаш тёлю «Альборц» лагерьни чегинде Минги тауда эришиу бардырылгъанды, анга Шимал Кавказ эм Ара федерал округладан спортчула къатышхандыла.

Бу фестивальны Элбрусда къурау ахшы тёреге айланнганды, ол Аскер искусстволаны союзуну башламчылыгъы эм «Хорламны эстафетасы» спорт-патриот акцияны чегинде онтогъузунчу кере ётдюрюледи. Сермешле, бир минутну шош туруп, Уллу Ата журт урушда ёлген жигитлерибизни эсгериу бла башланнгандыла. Эришиуню къууанчлы халда ачылыууна уа аскер къазауатланы ветераны Азаматланы Рашит, каратени кёкусинкай тюрлюсюнден федерациясыны таматасы Александр Кожевников, Къабарты-Малкъарны стол теннисден федерациясыны башчысы Андрей Климов, Аскер искусстволаны россейли союзуну СКФО-да жаш тёлю проектлерини куратору Алина Ковалёва, Россейни сыйлы тренери Къазийланы Михаил келгендиле. Усталыкъларын Нальчикни «Катана» эм «Фила» араланы, тренерле Этезланы Владимирни, Алим Эминовну эм Гияс Абушовну башчылыкъларында «Барс-Тырныауз» клубну эм Бабаланы Элнурда жарау этген жаш каратечиле кёргюзтгендиле.

Кульчаланы Зульфия.