Росгвардияны КьМР-де Управлениясыны келечилери «Свеча памяти» эсде тутуу жумушлагъа къатышхандыла.

22 июньда Нальчикни солуу паркында Уллу Ата журт уруш башланнган кюннге аталып, эсгериу жумушла болгъандыла. Анга республиканы власть органларыны, право низамны сакълаучу структураланы, жамауат эм жаш тёлю биригиулени келечилери, шахарчыла къатышхандыла. 

 Урушну, урунууну, Сауутланнган кючлени ветеранларыны Нальчик советни башчысы Абдуллаланы Мустафа жыйылгъанланы ол къанлы сермешледе Хорлам къаллай багъа бла келгенин эсде тутаргъа чакъыргъанды

Акциягъа къатышханла ол къазауатда мамырлыкъ ючюн жанларын бергенлени хурметине жау чыракъла жандыргъандыла, Ёмюрлюк от эсгертмеге гюлле салгъандыла.

-   Уллу Ата журт урушда миллионла жан бергендиле, ол хар юйюрге да бушуу келтиргенди. Ол тарых эсде ёмюрлеге сакъланырыкъды. Халкъны жигитлигин, Ата журтубуз сынагъан зорлукъну бла къыйынлыкъланы унутургъа жарамайды. Жигитлени атлары ёмюрлюк болсун! Бир адам да унутулмагъанды, - дегенди полицияны майору Марина Лукожева.

Тикаланы Фатима хазырлагъанды.