КъМР-ни Парламентини президиумуну кезиулю жыйылыуунда «правительстволу сагъатда» республикада къырал жашау журт надзорну къурауну эм кёп къатлы юйлеге башчылыкъ этген организациялагъа лицензия бериуню соруулары сюзюлгендиле. Кенгешни спикер Татьяна Егорова бардыргъанды.
КъМР-ни Тарифле эм жашау журт надзор жаны бла къырал комитетни башчысыны къуллугъун толтургъан Алим Макуашев билдиргенича, ведомство, жашау журтлагъа къырал контроль толтургъаны бла бирге, кёп къатлы юйлеге башчылыкъ этген компаниялагъа лицензияла бериуге да жууаплыды.
Бюгюнлюкде уа республикада кёп къатлы юйлеге башчылыкъ этиу бла 181 организация кюрешеди, ол санда 84 управляющий компания барды, дагъыда ТСЖ-ла, ЖСК-ла, ТСН-ле да къуралгъандыла. 635 кёп къатлы юйде жашагъанла башчылыкъ этиуню мадарларын кеслери сайлагъандыла, 251-не уа башчылыкъ болжаллы халда этиледи (ала сайлау этмегенлери бла байламлы).
Къырал жашау журт надзор толтургъан кезиуде юйледе жашагъанла бирге хайырланнган мюлкню аяулу хайырланыугъа энчи эс бурулады.
Былтыр 2,4 мингден аслам тарыгъыу сюзюлгенди, быйылны биринчи кварталында уа – 410. Планнга тийишлиликде 184 тинтиу бардырылгъанды, бири – пландан тышында. Быйыл а план бла 25 тинтиу къуралгъанды, 24 кезиуде инспекторла жеринде ангылатыу жумушла толтургъандыла.
Контроль-надзор иш бардырылып, жашау журт законлагъа былтыр 202 бузукълукъ этилгени тохташдырылгъанды, быйылны биринчи кварталында уа – 89. Алай бла былтыр законлагъа бузукълукъланы кетериу жаны бла 74 эсгертиу чыгъарылгъанды, быйылны бирини юч айында – 25.
Докладчы профилактика жумушланы, законланы ангылатыу, аланы толтуруу жаны бла тюбешиуле къуралгъанларын да билдиргенди.
- Комитет инсанла жашау журт-коммунал мюлк ючюн тёлеулени къалай этгенлерин тинтгенлей турады. Былтыр а ала терс саналгъанлары бла байламлы 292 тарыгъыу келгенди, терихле тергелип, 489 минг сом жангыдан юлешиннгенди. Ахчаны асламы фатарлада жашагъанла бирге хайырланнган мюлк ючюн терс саналгъанды,-дегенди докладчы.
2023 жылда оюлургъа къоркъуулу, жашаргъа жарамагъан мекямланы ачыкълау жаны бла ведомстволу комиссияны къауумунда 72 кёп къатлы юй сюзюлгенди. Аладан бешиси оюлургъа къоркъуулу халгъа жетгени, ючюсюнде уа жашаргъа жарамагъаны ачыкъланнганды.
Комитет КъМР-де Кёп къатлы юйлени тынгылы жангыртыуну регион операторну ишине къырал контроль этгенин айтханды Алим Макуашев. 2015 жылдан быйыл 31 мартха дери кезиуде тынгылы жангыртыу жумушла ючюн тёлеуле 57,8 процентге жетгенлерин билдиргенди. Бюгюнлюкде фондну къурау жаны бла 25 энчи счёт барды. Аланы иелери 2015 жылдан бери этген тёлеулени ёлчеми 72,7 процентге жетгенди.
Былтыр кёп къатлы юйлеге башчылыкъ этиу жаны бла 25 лицензия берилгенди, быйылны аллында юч айда - 9. Аны бла бирге былтыр 21 лицензияны кючю тохтатылгъанды.
Комитетни къуллукъчулары республиканы инсанлары бла тюбешиуледе даулашлы сорууланы сюзгенлерин магъаналы ишледен бирине санагъанды докладчы. Законлагъа тюзетиулени ангылатыр мурат бла семинарла бардырыладыла. СКФО-да биринчилени санында болуп, регионда «Типовое облачное решение по автоматизации контрольной (надзорной) деятельности» системаны кийиргендиле.
«Госуслуги.Дом» мобильный приложенияны сингдирир эм кенг хайырланылырын жалчытыр мурат бла жер-жерли самоуправление органланы оноучулары бла тюбешиуле бардырыладыла.
Тарифле эм жашау журт надзор жаны бла къырал комитетни ишин сюзе, Татьяна Егорова депутатлагъа кёп къатлы юйлеге башчылыкъ этген компанияланы ишлерине, ЖКХ-ны болумуна тарыгъыула келгенлерин айтханды. Спикер башчылыкъ этген компанияланы ишлерини ачыкълыкъларын жалчытыу жаны бла къаллай мадарла бардырылгъанларын соргъанды.
Алим Макуашев айтханыча, законлагъа тийишлиликде, компанияла басмалагъан тарихлени комитет сюзерге эркин тюйюлдю. Алай кёп къатлы юйде жашагъанла бузукълукъланы кёре эселе, ала компанияны алышыргъа боллукъдула. Дагъыда керекли шартланы «Госуслуги.Дом» приложенияда табаргъа онг барды.
Урунуу, социал къоруулау эм саулукъ сакълау комитетни башчсыны орунбасары Владимир Безгодько фатарлада жашагъанла бирге хайырланнган мюлк ючюн тёлеулени тюзлюклерин тинтиуню юсюнден айтханды.
Жыйылыуда башчылыкъ этген компанияланы ишлерине жамауат къарауну, кёп къатлы юйлени ишлетген кезиуде кемчиликлени юслеринден да айтылгъанды. Депутатла адамладан келген тарыгъыуланы ачыкъ этип, къырал комитетни алагъа эс бурургъа чакъыргъандыла.
Парламентни Къурулуш, жашау журт-коммунал мюлк эм отлукъ-энергетика жаны бла комитетини башчысы Руслан Токов бу сферада бузукълукъла бла ишлегенле, аны бла бирге борчларын тюзлюк бла толтургъанла да болгъанларын айтханды. Жууукъ кезиуде уа фатарлада жашагъанла бирге хайырланнган мюлк ючюн тёлеулени къурауну соруулары «тёгерек стол» къуралып, анда сюзюллюклерин билдиргенди депутат.
Кенгеш жуаплы органлагъа эсгертиулени къабыл кёрюу бла бошалгъанды.
КъМР-ни Парламентини пресс-службасы.
