Налшык къалэм дэт Му­зы­кэ театрым щекIуэкIащ медицинэм и лэжьакIуэхэр щагъэлъапIэ зэхыхьэ гуапэ. Ар къызэIуахащ узыншагъэр хъумэнымкIэ IэнатIэм пэ­рыт­хэм я махуэ лэжьыгъэр зэрекIуэкIым ухэзыгъэ­гъуазэ видеотеплъэгъуэкIэ. Адэк­Iэ махуэшхуэр зейхэм фIыщIэ, щытхъу псалъэхэмкIэ зыхуагъэзащ IуэхущIапIэ щхьэхуэхэм я лIыкIуэхэм. 
КъБР-м и Iэтащхьэ КIуэкIуэ Казбек медицинэм и лэ­жь­а­кIуэхэм зэрызахуигъазэм къеджащ республикэм и Уна­фэщIым и Администрацэм и Уна­фэщI Къуэдзокъуэ Му­хьэмэд. иужькIэ абы къыхи­гъэ­щащ а унэ­тIы­ныгъэм щылажьэхэм къэралым къыбгъэдэкIыу яхуэ­фэ­щэн фIы­щIэрэ щытхъурэ зэ­рагъуэтыр икIи жиIащ Урысейм и махуэм ирихьэлIэу зыпэрыт IэнатIэм зэфIэкI лъагэ­хэр къы­щы­зы­гъэ­лъэ­гъуа­хэм дамыгъэ лъа­пIэхэр зэрыратыжар: «Уры­­сей Федерацэм щIыхь зиIэ и ­дохутыр» цIэ лъапIэр къы­хуагъэфэщащ суд-медэксперт, ГБУЗ-м экспертизэ нэхъ гугъухэмкIэ и къудамэм и унафэщI Мечу­каев Азрэт, ­КъБР-м и ЩIыхь тхылъыр иратащ Налшык дэт къалэ поликлиникэ №2-м и дохутыр нэхъыщхьэ Емуз Маринэ, ­«КъБР-м щIыхь зиIэ и дохутыр» цIэр фIащащ Тэрч ­районым щыIэ Плановскэ ­къуа­жэм и сымаджэщым и унафэщI Тау Эллэ. Апхуэдэуи къигъэлъэгъуащ иджыри медицинэм и лэжьакIуэ зыбжанэм щIыхьыцIэхэр яфIэ­щы­ным, дамыгъэ лъапIэхэр етыным теухуа унафэм а махуэм КъБР-м и Iэтащхьэм Iэ зэрыщIидзар. «КъБР-м щIыхь зиIэ и дохутыр» цIэр хуагъэфэщащ Нарткъалэ дэт, ЩIына­лъэ­хэм зэдай, узыфэ зэмы­лIэу­жьыгъуэхэр зыпкърытхэм щеIэзэ сымаджэщым операцэхэр щрагъэкIуэкI и къудамэм и унафэщI Бэракъ Олег, Шэрэдж район сымаджэщым и акушер-гинеколог Ульбашевэ Казибан, УнэтIыныгъэ куэду зэхэт республикэ сабий клиникэ центрым и къудамэм и унафэщI, дохутыр-неонатолог Шыхъуэ Терезэ. «КъБР-м узыншагъэр хъумэнымкIэ  щIыхь зиIэ и лэ­жьакIуэ» цIэр фIащащ «Фармедтех» IуэхущIапIэм и провизор Албэч Жанеттэрэ КъБР-м Узыншагъэр хъумэнымкIэ и министерствэм и къудамэм и уна­фэщI Кос Татьянэрэ. Абы­хэм я дамыгъэхэр иратыжынущ фокIадэм и 1-м, Республикэм и Къэралыгъуэм и махуэр щагъэлъапIэм ирихьэлIэу.
КъБР-м и Парламентым и Уна­­фэщI Егоровэ Татьянэ къы­­щыпсалъэм къыхи­гъэ­щащ­ узыншагъэр дэтхэнэ зы цIыхуми бгъэдэлъ лъапIэныгъэ нэ­хъы­щхьэу зэрыщытыр, ар уимы­Iэмэ, щызу щыт гъащIэ на­сы­пыфIэ зэрыпхуемы­хьэ­кIы­нур. 
- Дохутыр IэщIагъэм и мы­хьэнэр зэрыиныр, узыншагъэр зыхуэдэнур куэдкIэ медицинэ лэжьакIуэхэм зэрелъытар иужьрей илъэсхэм дызэрыта щытыкIэм иджыри зэ наIуэ тщищIащ, - жиIащ абы. - Тхьэмахуэ, махуэшхуэ зыгъэпсэхугъуэ фимыIэу фэ жэуаплыныгъэшхуэ зыпылъ фи къалэныр ивохьэкI: фэ дэIэпыкъуэгъу фохъу сабийр дунейм къытехьэнымкIэ, лIыгъэшхуэрэ Iэзагъышхуэрэ къэв­гъэлъагъуэу сыхьэт бжы­гъэ­кIэрэ операцэхэр ивогъэ­кIуэкI, фхузэфIокI сымаджэ нэхъ хьэлъэ дыдэхэри узым къыIэщIэфхын, сыт хуэдэ зэманми цIыхухэр зыхуэныкъуэ Iуэхутхьэбзэхэр фи деж ща­гъуэт. Абы папщIэ фIыщIэ фхудощI икIи ди щхьэр фхудогъэщхъ. Шэч къытесхьэркъым фи щIэныгъэр, Iэзагъэр, фи псэм и хуабагъэр, гуа­пагъэр цIыхухэм щхьэпэ яхуэхъуу фи IэнатIэр зэреф­хьэкIым. Апхуэдэу псалъэ ­гуапэхэмкIэ захуэзгъэзэну сыхуейт а IэщIагъэм илъэс бжы­гъэ куэдкIэ ирилэжьа, медицинэм и ветеранхэм. Фэ фи гуа­щIэшхуэ хэлъщ республикэм узыншагъэр хъумэнымкIэ и IэнатIэр зэрызэфIэувам, хэлъ­хьэныгъэшхуэ хуэфщIащ абы и зыужьыныгъэм. А зэманым фIагъышхуэ зиIэ техникэ­хэм­рэ Iэмэпсы­мэ­хэм­рэ фимыIами, нобэрей медицинэр иджы арыншэу уи нэгу къызэрыпхущIэмыгъэхьэ IэмалыщIэхэм фыпэIэщIэу щы­тами, фи щIэ­ныгъэ куум, IэщIагъэм фызэ­рыхуэпэжым, сымаджэхэм яхувиIэ ­гулъы­тэм и фIыгъэкIэ фэ ­IэнатIэм сытым дежи­­ ­ехъу­лIэныгъэфIхэр щызыIэ­рывгъэхьэфырт. Абы и лъэны­къуэкIэ фэ щапхъэ фахуохъу фи ужь ит щIэблэм. Фи фIыщIэр инщ, щытхъур къып­хуэ­мылъытэнщ. Жэуаплыныгъэшхуэ зыпылъ, мыхьэ­нэш­хуэ зиIэ IэщIагъэр къыхэзыха псоми сынывохъуэхъу цIы­ху­хэм фазэрыхуэупсэ фIы­гъуэ нэхъыщхьэм - узыншагъэм - фыщымыщIэу, фи къэ­кIуэнур дахэу, фи къалэн гугъур тынш къыфщызыщIын шыIэныгъэрэ дэрэжэгъуэрэ фиIэу, фи IэнатIэм къыпэкIуэ пщIэ нэхъ лъагэ дыдэр, сымаджэхэм я арэзыныгъэр, сы­тым щыгъуи къэвлэжьыфу, ма­хуэ къэс къывбгъэдэкI фIы­м­рэ гуапагъэмрэ фыщы­мы­щIэу фи IэнатIэр ефхьэкIыну.
КъБР-м и Правительствэм и Уна­фэщI Мусуков Алий жи­Iащ жылагъуэ узыншэм и лъабжьэр зыубзыхур медицинэ лэ­жьакIуэхэрауэ зэрыщытыр икIи сымаджэр зэфIэгъэувэжын папщIэ зи къаруи зи зэ­ма­ни емыблэжу зыпэрыт Iуэ­хур нэгъэсауэ зыгъэзащIэхэм фIыщIэрэ щытхъурэ зэрахуэфащэр. Ар медицинэм и лэ­жьакIуэ­хэм ехъуэхъуащ я лэ­жьыгъэм ехъу­лIэныгъэ ща­Iэну икIи къыхигъэщащ абы­хэм IэнатIэм щаIэ зэфIэкI ­лъагэм цIыхубэм я узыншагъэр зэрелъытар.

КъБР-м узыншагъэр хъумэнымкIэ и IэнатIэм и лэжьакIуэхэм я проф­союзым и унафэщI Яськовэ Ольгэ жиIащ цIыху гъащIэр къегъэлыным, узыншагъэр зэфIэгъэувэжыным зи гуащIэ хуэзыгъэпса IэщIагъэлIхэм псалъэ гуапэ куэд зэрахуэфащэр, абыхэм яхуэгъэзауэ пшыхьым щыIуа дэтхэнэ псалъэри яхуэфащэ дыдэу зэрыщытыр. Зи махуэр зыгъэлъапIэ­хэм ар ехъуэхъуащ зэIузэпэщыгъэ яIэу, я Iуэхур ефIакIуэу адэкIи я IэнатIэр ирахьэкIыну. 
Яськовэ Ольгэ Урысей Федерацэм узыншагъэр хъумэнымкIэ и IэнатIэм и лэжьакIуэхэм я профсоюзым и комитет нэхъыщхьэм къыбгъэдэкIыу КъБР-м Узыншагъэр хъумэнымкIэ и министр Къалэбатэ Рустам иритыжащ «Лучший социальный партнер» бгъэхэIу дамыгъэмрэ фIыщIэ тхы­лъымрэ. 
Къалэбатэ Рустам къыщыпсалъэм къыхигъэщащ илъэс блэкIар тыншу щымытами, IэнатIэм ехъулIэныгъэ хъар­зынэхэр зэрыщызыIэрагъэхьар икIи гуп зэкъуэтым я лэжьыгъэм и фIыгъэкIэ цIыху мин бжыгъэхэм я узыншагъэр зэрызэтрагъэувэжар, абыхэм я дэIэпыкъуныгъэкIэ сабий мин бжыгъэ дунейм къызэрытехьар.
- Нобэ IэнатIэр йофIакIуэ, - жиIащ министрым, - Урысейм и Президент Путин Владимир и жэрдэмкIэ къы­халъхьа лъэпкъ проектхэр ди республикэм и Iэтащхьэм и дэIэпыкъу­ныгъэкIэ щIыналъэм хъарзынэу щагъэзащIэ. Ди унэтIыныгъэмкIэ щыIэ проектхэм хъарзынэу дызэрехъулIэм и щыхьэтщ а IуэхумкIэ къэралым щы­пэрыт щIыналъэхэм ящыщу дыкъы­зэралъытар. А проектхэм япкъ иткIэ республикэм и амбулаторэ, поликлиникэ куэд зэдгъэпэщыжащ, медицинэ IуэхущIапIэхэр зыхуэныкъуэ Iэ­мэ­псымэхэмкIэ къызэдгъэпэщащ. А псори къыщIыдэхъулIэр ди IэщIагъэлIхэр жэуаплыныгъэ зэрахэ­лъырщ. Республикэм узыншагъэр ­хъумэнымкIэ и IэнатIэм щылажьэ гупыр зы унагъуэшхуэм хуэдэу зэ­хэтщ. Зыпэрыт Iуэхум, щылажьэ щIы­пIэм елъытакъым абыхэм я зэфIэ­кIыр, псоми я къарур зыхуэунэтIар зы къалэнщ - цIыхухэм я узыншагъэр ­хъумэнырщ. Гуп зэкъуэтырщ зыху­зэ­фIэкIынур нобэ республикэм медици­нэмкIэ зыIэригъэхьа ехъулIэныгъэ­хэр. IэщIагъэм къыфхуигъэув къалэн гугъур нэгъэсауэ зэрывгъэзащIэм ­папщIэ фIыщIэ фхузощI, узыншагъэ, мамырыгъэ, фIыгъуэ, зэIузэпэщыгъэ фиIэну си гуапэщ.
Министрым фIыщIэ яхуищIащ къра­хьэжьэ сыт хуэдэ Iуэхухэри ­къа­дэзыIыгъ республикэ уна­фэщI­хэм икIи жиIащ илъэс къэс Ме­дицинэм и лэ­жьакIуэм и махуэр ­щагъэлъапIэ пшыхьым зыкърагъэ­хьэлIэу IэщIагъэлIхэр зэрагъэпажэм, псалъэ гуа­пэхэмкIэ зэрызыкъыхуагъазэм абы­хэм я пщIэр къызэриIэтыр.
IэнатIэм зэфIэкI хъарзынэхэр къы­щызыгъэлъагъуэ лэжьакIуэхэм иратащ КъБР-м и Парламентым, Правительствэм, Узыншагъэр хъумэнымкIэ министерствэм я щIыхь, фIыщIэ тхылъхэр. 
КъищынэмащIауэ, пшыхьым щагъэпэжащ медицинэм и лэжьакIуэ­хэм я республикэ спартакиадэм щытекIуахэр. Япэ увыпIэр къахьащ Психиатриемрэ наркологиемкIэ респуб­ликэ клиникэ центрым, Жьэн узы­фэм щеIэзэ диспансерым, Перинатальнэ центрым, Суд-медицинэ эксперти­зэм­кIэ бюром, Сабийхэм я узыншагъэр щрагъэфIэкIуэж центрым и лэ­жьакIуэхэр зыхэт «Триумф»-р, етIуа­нэр яубыдащ Бахъсэн, Зеикъуэ район сымаджэщхэм, Бахъсэн къалэ дэт стоматологие поликлиникэм и лIы­кIуэхэм къызэрагъэпэща «Бахъсэн Аузым», ещанэ хъуащ Къэбэрдей-­Балъкъэрым къэхъукъащIэ къызэры­мыкIуэхэм хэхуахэм защIэгъэкъуэ­нымрэ медицинэ дэIэпыкъуэгъу псын­щIэмкIэ и центрым, Налшык ­къалэ дэт поликлиникэ №№1-м, 2-м, 3-м, Гериатрие центрым и IэщIагъэлI­хэм къызэрагъэпэща «Черные волки» гупыр. 
Пшыхьыр ягъэдэхащ КъБР-м узыншагъэр хъумэнымкIэ и министерст­вэм и «36,6» хорым, уэрэджыIакIуэ, къэфакIуэ ансамбль цIэрыIуэхэм. 

ЩХЬЭЩЭМЫЩI Изэ.
Сурэтхэр Къарей Элинэ трихащ.