Музыкэ къэрал театрым мэкъуауэгъуэм и 17-м къыщызэIуахащ «Къэбэрдей-Балъкъэр-2024» кинофестивалыр. Ар УФ-м Щэн­хабзэмкIэ и министерствэмрэ КъБР-м и Правительствэмрэ я дэIэпыкъуэгъуу ­ирагъэкIуэкI. Зэхыхьэм хэгъэрейхэм ящыщу хэтащ республикэм и режиссёр, актёр, уэрэджыIакIуэ цIэрыIуэхэр, журналистхэр. 

Урысейм кинематографие щIэныгъэ­хэм­рэ гъуазджэхэмкIэ и академием и академик, КъБР-м гъуазджэхэмкIэ щIыхь зиIэ и лэ­жьакIуэ, урысейпсо, лъэпкъыбэ кинофестивалхэм я къызэгъэпэщакIуэ икIи я президент Новожилов Сергей зэхыхьэ гуапэм зыкъре­зыгъэхьэлIахэм фIэхъус ярихащ икIи мы махуэхэм екIуэкIыну кинофестивалым хэтыну иригъэблэгъащ. Зэхуэсахэм абы яригъэ­цIы­хуащ урыс, хамэ къэрал артистхэр, ирагъэблэгъа хьэщIэхэр. 
Алэрыбгъу плъыжьым Iэгуауэшхуэм щIэту ирикIуащ театрымрэ и киномрэ я актёр цIэрыIуэхэр, УФ-м и цIыхубэ, щIыхь зиIэ артистхэр. Ди республикэм и хьэщIэщ Назаров Юрий, Костинэ Еленэ, Нечитайлэ Полинэ, Колосов Максим, Беляев Станислав, Ливанов Аристарх, Судец Татьянэ, Чернецкий Руслан, Красько Ольгэ, Крайновэ Янэ, Капустин Вадим, Перадзе Георгий, Латушкэ Иван, Алексеев Артём, Бутенкэ Владимир, Запорожский Кирилл, Зацепин Антон, Мес­порян Анд­раник сымэ, нэгъуэщIхэри. 
КъБР-м и министр Къумахуэ Мухьэдин кинофестивалым хэтхэм фIэхъус гуапэ ярихащ икIи жиIащ, хабзэ дахэ хъуауэ, фильмхэм зэгъусэу щеплъыну, Урысейм, нэгъуэщI къэ­ралхэм я артистхэр щызрагъэцIыхуну пIалъэр аргуэру къызэрысар. Министрым фес­тивалыр къызэзыгъэпэщахэм ехъуэхъуащ я лэжьыгъэр къехъулIэну, абы еплъынухэм ­загъэпсэхуну. 
- Кинофестивалым зыкърезыгъэхьэлIа­хэми, Къэбэрдей-Балъкъэрым исхэми, Урысейм и щIыпIэхэм къикIахэми сынывохъуэхъу насып, гуапагъэ, ехъулIэныгъэ фиIэну! - жи­Iащ Къумахуэ Мухьэдин. - Фестивалым ху­дожественнэ фильмхэм къадэкIуэу, концертхэр, пшыхьхэр, актёр IэзагъэмкIэ мастер-классхэр къыщызэрагъэпэщынущ.
Фестивалым иращIэкIа концертым усэхэм къыщеджащ, уэрэдхэр жаIащ, лъэпкъ къа­фэхэр ягъэзэщIащ. Зэраубзыхуам тету, мы махуэхэм «Форум», «Кругозор» кинотеатрхэм щагъэлъэгъуэнущ Куржым, Испанием, Къыргъызым, Сербием, Тыркум, Урысейм щытраха фильмхэр. Зэхуэсхэм хэтынухэмрэ абыхэм зыкърезыгъэхьэлIэнухэмрэ Iэмал яIэщ урыс, дунейпсо кинофестивалхэм щагъэ­лъэгъуа, саугъэт нэхъыщхьэхэр зы­хуагъэфэща фильмхэм еплъыну. Киногъуазджэр фIыуэ зылъагъухэм IэмалыфI яIэщ кино­театрхэм иджыри щамыгъэлъэгъуа кино нэхъыфIхэм щеплъыну. Кинофестивалыр мэ­къуауэгъуэм и 21-рэ пщIондэ екIуэкIынущ. 

ТЕКIУЖЬ Заретэ.
Сурэтхэр  Къарей  Элинэ  трихащ.