КъБР-м и Парламентым и УнафэщI Егоровэ Татьянэ ири­гъэкIуэкIащ республикэм и хабзэубзыху органым и зи чэзу зэIущIэ. «Прави­тельствэм и сыхьэтым» ­къриубыдэу Парламентым хэтхэр тепсэлъыхьащ Къэ­бэрдей-Балъкъэр Республикэм къат куэду зытет унэхэр хабзэм ­тету зэрызэрахьэм кIэ­лъыплъ­ къэрал надзорым и лэ­жьыгъэр къызэгъэ­пэ­щы­ным. 

ЗэIущIэм къыщыпсэлъащ Тарифхэмрэ псэупIэхэм кIэ­лъып­лъынымкIэ КъБР-м и Къэрал комитетым и уна­фэ­щIым и къалэнхэр зыгъэзащIэ Мэкъушэ Алим. Абы зэрыжи­IамкIэ, республикэм унэу итыр метр зэбгъузэнатIэ мелуан 18 ирокъу, къат куэду зэтет унэ­хэр (МКД) 2692-рэ мэхъу. Къат куэду зэтет унэхэм ящыщу 1806-м я Iуэхур зегъэкIуэным йолэжь юристи 181-рэ. Унэ 1682-р­ нэгъуэщI IуэхущIапIэ 84-м епхащ, унэ 635-р щып­сэухэм зрахьэж, 251-м иджы­ри зы унафи ягъуэтакъым. 
2023 гъэм къриубыдэу комитетыр хэплъащ цIыхухэм зэ­рызыкъыхуагъэза Iуэху 2494-м, 2024 гъэм и япэ мазищым хуэзэу - 410-м. Нэгъабэ къэпщытэныгъэ 185-рэ, инспекцэ 26-рэ ирагъэкIуэкIащ. 
А псоми къызэрагъэлъэ­гъуамкIэ, 2023 гъэм псэупIэм теухуа законодательствэр 202-рэ къызэпаудащ, мы гъэм и япэ мазищым къриубыдэу – 89-рэ. Абы пэкIуэжу 2023 гъэм КъБР-м и псэупIэ инспекцэм и лэжьакIуэхэм ятхащ а ныкъу­са­ныгъэхэр гъэзэкIуэжынымкIэ тхыгъэ 74-рэ, 2024 гъэм и япэ мазищым къахутам теу­хуауэ – 25-рэ. 
2023 гъэм къыщыщIэдзауэ мы гъэм и япэ мазищыр хиубыдэу къат куэду зэтет унэ 561-рэ къапщытащ икIи къы­щIагъэща ныкъусаныгъэхэм теухуауэ административнэ жэуапым ирашэлIэну цIыху 12-м тхыгъэ хуагъэхьэзыращ. 
ЦIыхухэм хъыбар егъэ­щIэ­нымкIэ, фэбжь ямыгъуэты­ным­кIэ, я Iуэхухэр зэфIэ­хы­ным­кIэ комитетым иригъэ­кIуэкI лэжьыгъэм теухуауэ ­Мэкъушэм жиIащ 2023 гъэм Iуэху­щIапIэм тхыгъэ 539-рэ зэритар. 
- ПсэупIэ-коммунальнэ Iуэ­ху­т­хьэбзэхэм я пщIэр и чэзу къызэратым кIэлъоплъ комитетыр: 2023 гъэм къриубыдэу ап­хуэдэпщIэхэр и чэзум къы­зэрамытымкIэ дыхэплъащ Iуэху 292-м. Электрокъарур къызэрагъэсэбэпамкIэ пцIыуэ къабжауэ сом мин 489-рэ щIэрыщIэу къэдбжыжащ, - жиIащ къулыкъущIэм. 
КъищынэмыщIауэ, жьы ­хъуа­ унэ 72-рэ къапщытащ, абы­­хэм ущыпсэу хъунрэ мыхъунрэ зэхагъэкIын папщIэ, икIи унищыр ихын хуейуэ уна­фэ къащтащ. Мэкъушэм зэ­рыжиIамкIэ, къат куэду зэтет унэхэм я Iуэхухэр зехьэнымкIэ хьэрычэтыщIэ 22-м хуитыныгъэ иратащ 2023 гъэм, 2024 гъэм – 9. 
Апхуэдэ IуэхущIапIэхэм я лэжьыгъэр къапщытэ хабзэщ 2017 гъэ лъандэрэ. ИкIи ­КъБР-м щрагъэкIуэкIа къэпщытэныгъэхэм къызэрагъэлъэгъуамкIэ, я къалэнхэм нэхъ пэлъэщу къыщIэкIар Iуэху­щIапIи 4-щ. 
Мы унэтIыныгъэмкIэ къэралым щызекIуэ хабзэм игъуэт зэхъуэкIыныгъэхэр унэхэр зезыхьэ IуэхущIапIэхэм ягуры­гъэ­IуэнымкIэ комитетым зэIущIэ зэмылIэужьыгъуэхэр къы­зэрегъэпэщ. Апхуэдэу, 2023 гъэм къриубыдэу жылагъуэм я тхьэусыхафэ 251-м хэплъащ комитетыр. 
Унэм ехьэлIа Iуэхутхьэбзэхэм, Iуэхугъуэхэм, упщIэхэм, хабзэм халъхьа зэхъуэкIыныгъэхэм дэтхэнэми щыгъуазэ зыщищIыфынущ «Госуслуги.Дом» телефон гуэдзэнымкIэ. А гуэдзэныр Къэбэрдей-Балъкъэрым щыпхагъэкIыным теухуауэ, ди цIыхухэм хуиту къагъэсэбэпынымкIэ лэжьы­гъэш­­хуэ ирегъэкIуэкI Iуэху­щIап­Iэм. 
Егоровэ Татьянэ къыхигъэщащ цIыхухэм ЖКХ-м епхауэ гукъеуэ куэд зэраIэр, я Iуэху­хэр зэхэгъэкIынымкIэ депутатхэр щIэгъэкъуэн яхуэхъуну лъа­Iуэу къазэрыхуэтхэр, икIи я къару къызэрихькIэ зэрадэ­Iэпыкъур. Парламентым и УнафэщIыр щIэупщIащ управ­ляющэ IуэхущIапIэхэм я лэ­жьыгъэр зэрагъэзащIэр къы­зэрапщытэм. 
Мэкъушэм зэрыжиIамкIэ, апхуэдэ IуэхущIапIэхэм я лэ­жьыгъэм теухуауэ къагъэлъагъуэ бжыгъэхэр комитетым къызэримыпщытэр, езы управленэхэм я лэжьыгъэмкIэ яхь жэуапым ар зэрыщыщыр. 
ЛэжьыгъэмкIэ, социальнэ политикэмрэ узыншагъэр ­хъумэнымкIэ КъБР-м и Парламентым и комитетым и уна­фэщIым и къуэдзэ Безгодькэ Владимир къыхилъхьащ къат куэду зытет унэхэм щIэсхэм къы­зэдагъэсэбэп мылъкум теухуауэ цIыхухэм ят уасэр зэрагъэбелджылымрэ къыхахар къызэрагъэсэбэпымрэ кIэ­лъыплъ щыIэн зэрыхуейр. 
УхуэныгъэмкIэ, ЖКХ-рэ гъэсыныпхъэ комплексымкIэ КъБР-м и Парламентым и комитетым и унафэщI Токъу Руслан жиIащ управляющэ Iуэху­щIапIэхэм я лэжьыгъэр тэмэму зэрамыгъэзащIэмкIэ тхьэу­сыхафэ куэд къазэры­Iэрыхьэр, ауэ щытхъу зиIэхэри зэрыщыIэр. Абы зэрыжиIамкIэ, комитетым мыгувэу иригъэкIуэкIынущ къат куэду зэтет унэхэр зэрызэрахьэм трагъахуэ уасэхэр зыхуэдэм щыхэплъэну зэIущIэ. 

КъБР-м и Парламентым и хъыбарегъащIэ IуэхущIапэ.