Кёп болмай Басхан шахарны жер-жерли самоуправлениясыны Советини депутатлары таза суу бла жалчытырча иш къалай тамамланнганы бла шагъырейленнгендиле. Эсге сала айтсакъ, Басхан районну администрациясы юч жылдан мындан алгъада хазырлагъан проект Къабарты-Малкъарны Башчысы Казбек Коковну болушлугъу бла бардырылады.

Бюгюнлюкде аны хайыры бла Заюково, Атажукино, Исламей, Баксаненок эм Псычох эллени танг кесек скважинала ишлемей, иги да учуз таза суу бла жалчытыргъа жарарыкъды. Андан сора да, 2038 жылгъа дери инвестор Басханда 260 минг квадрат метрден асламда жашау журт салыр мураты барды. Аланы да таза суу бла сылтаусуз этерге себеплик боллукъду. Аны бла бирге къурулуш ишле башлансала, регионну бюджетине налогладан танг кесек файда тюшерикди. Дагъыда 240 чакълы ишчи жер да къураллыкъды.

Адам санына дайым къошула баргъанын эсге алсакъ, 2040 жылгъа сагъынылгъан элледе 160 минг адам жашарыкъды. Аланы суу бла тынгылы этерча суткагъа 40 минг куб керек боллукъду. Бюгюнлюкде алада 98 мингден артыкъ адам жашайды. Аланы эки тенглиден бири ичер суулары болмай къыйналадыла.  Ол себепден ичер суу жетмегени баш проблемаладан бирине саналады.

Проектни бардырырдан алгъа, Басхан шахарны администрациясыны башчысы Хачим Мамхегов Тызыл сууну къурамын тинтирча бир къауум кере комиссия бла болгъанды. Эсепледе кёргюзтгенлерича, черекни кесинден ичсе окъуна, бир тюрлю къоркъуу болмагъаны ачыкъланнганды. Бюгюнлюкде суу ыз тартыллыкъ, резервуарла ишленирик жерле да белгиленнгендиле. Бусагъатда подряд организацияны келечилери Исламейни къатында кюрешедиле. Планнга кёре, аны уллулугъу 79 километрге жетерикди.

Графикге тийишлиликде, объект келир жылны ахырына битерикди.