Дзюдо

Адыгейм и къалащхьэ Майкъуапэ иджыблагъэ щекIуэкIащ СССР-м щIыхь зиIэ и тренер Куэблэ Екъуб и фэеплъу дзюдомкIэ «А» класс зиIэ 11-нэ урысейпсо зэхьэзэхуэ. ЩIалэхэри хъыджэбзхэри зэхэту, гуп 14-у гуэшауэ абы щызэпеуащ къэралым и щIыналъэхэм ящыщу 22-м я бэнакIуэ 230-м щIигъу. 

Къэбэрдей-Балъкъэрым и щIыхьыр ихъумэу зэхьэзэхуэм хэтащ Къущхьэ Темырлан. Килограмм 73-рэ зи хьэлъагъхэм я деж щыбанэ ди щIалэм хузэфIэкIащ ещанэ увыпIэр абы къыщихьын. ЯпэщIыкIэ къызэрыхах зэIущIэхэм щыщу щым ар щытекIуэри, финалым и Iыхьэ плIанэм икIын папщIэ пэщIэхуащ Осетие Ищхъэрэ – Аланием и бэнакIуэ Темиров Темыр. Ди жагъуэ зэрыхъущи, осетин щIалэр къытекIуэри, Темырлан «финал цIыкIум» ягъэкIуащ. АдэкIэ, аргуэрыжу, зэIущIищым ар щытекIуэри, домбеякъ медалыр и хьэрхуэрэгъухэм къафIихьащ. 
Къыхэдгъэщынщи, иджы екIуэкIа зэхьэзэхуэм щытекIуахэм Iэмал ягъуэтащ Урысей Федерацэм дзюдомкIэ и чемпионатым хэтыну, абы нэмыщI, къыфIащащ УФ-м спортымкIэ и мастер цIэ лъапIэр.
 

ТОМЭКЪУЭ Iэдэм.