Урысей Федерацэм и Къэрал Думэм и УнафэщIым и къуэдзэ Гордеев Алексей, УФ-м мэкъумэш хозяйствэмкIэ и министрым и къуэдзэ - статс-секретарь Увайдов Максим, «Роскачество»-м и унафэщI Протасов Максим сымэ иджыблагъэ тепсэлъыхьащ къэралым ерыскъыхэкI, псыхэкI къабзэхэр (щIыгъэпшэрхэр, химие пкъыгъуэхэр, хущхъуэхэр, н.къ. зыхэмылъ продукцэхэр) къыщIэзыгъэкI IуэхущIапIэхэм я Iуэхухэр зэрыдэкIымрэ абыхэм зэрызаужь щIыкIэмрэ.
«Органикэ продукцэхэм я IуэхукIэ» хабзэр зэрылажьэ илъэсиплIым къриубыдэу, Урысейм щатащ IуэхущIапIэхэм къыщIагъэкIа продукцэхэр зэрыкъабзэм щыхьэт техъуэ сертификату 430-рэ. Гордеев Алексей къыщыпсэлъам къыхигъэщащ апхуэдэ IуэхущIапIэхэм я бжыгъэм илъэс къэс къызэрыхэхъуэр икIи ахэр къэралым и щIыналъэхэм ящыщу 49-м зэрыщылажьэр. Органикэ продукцэхэр къыщIэзыгъэкI IуэхущIапIэхэр щатхащ УФ-м Мэкъумэш хозяйствэмкIэ и министерствэм щыIэ зыуэ щыт и реестрым. Абы къыщыпхуэгъуэтынущ IуэхущIапIэм къыщIигъэкI ерыскъым е ерыскъыхэкIым теухуауэ щыIэ хъыбархэр: къыщыщIагъэкIа щIыпIэр, зэманыр, куэдагъыр, н.къ.
Гордеев Алексей апхуэдэуи къыхигъэщащ ерыскъыхэкI, псыхэкI къабзэхэр къыщIэзыгъэкI IуэхущIапIэхэми щэхуакIуэхэми яIэ хабзэхэр хъумэн зэрыхуейр. Псалъэм папщIэ, «Органикэ продукцэхэм я IуэхукIэ» хабзэм нэгъабэ зэхъуэкIыныгъэхэр халъхьащ, ерыскъыхэкIхэм, псыхэкIхэм я къабзагъэм щыхьэт техъуэу, сыт хуэдэ дамыгъэхэр абы трагъэувэ хъунуми къыщыгъэлъэгъуауэ. Апхуэдэ IуэхущIапIэхэм, «Росаккредитация»-м къалэн зыщищIа къэрал къулыкъу IэнатIэхэм я деж къыщраIыхын хуейщ я продукцэхэр зэрыкъабзэм щыхьэт техъуэ сертификатхэр. ИужькIэ, къыщIагъэкIа продукцэм «органика» псалъэр тратхэфын щхьэкIэ. Сыту жыпIэмэ, 2024 гъэм фокIадэм и I-м щегъэжьауэ, ерыскъым, ерыскъыпхъэхэм, псыхэкIхэм «биодинамический», «биологический», «экологический», «экологический чистый», «эко», «био» псалъэхэр е и мыхьэнэкIэ абыхэм яхуэкIуэ нэгъуэщI псалъэхэр я продуцэхэм тратхэу къыхуадэнукъым, языныкъуэхэми паубыдынущ. Апхуэдэу щIащIыр щэхуакIуэхэр кърамыгъэгъэпцIэн, абыхэм я хабзэхэр хъума хъун щхьэкIэщ.
УФ-м и Къэрал Думэм и УнафэщIым и къуэдзэм апхуэдэуи къыхигъэщащ къэралым и сату щIыпIэхэр органикэ продукцэхэмкIэ нэсу къызэгъэпэщыным мыхьэнэшхуэ зэрыратыр икIи ар я къалэн нэхъыщхьэу зэрыщытыр.
Протасов Максим тепсэлъыхьащ ерыскъы къабзэхэр къыщIэзыгъэкI IуэхущIапIэхэм къэралым зэрызыщаужь щIыкIэм. Иджыпсту мэкъумэш IэнатIэм щхьэхуэу къыщызэрагъэпэщ щIыгъэпшэрхэр, химие пкъыгъуэхэр, хущхъуэхэр, н. къ. я продукцэхэм хэзымылъхьэ IэхущIапIэхэр. Апхуэдэхэм я бжыгъэм къызэрыхагъэхъуэным ехьэлIауэ лэжьыгъэ пыухыкIахэри ирагъэкIуэкI. Абыхэм яхохьэ «Роскачество»-м ита сертификатхэр хамэ къэралхэм щыпхыгъэкIыныр, абыхэм я фIагъыр нэгъуэщIхэм ейхэм зэрапеуэфынур къыщегъэлъытэныр, сату зэпыщIэныгъэхэм зегъэубгъуныр.
Абы нэмыщI, къэралым и сату щIыпIэхэм органикэ продукцэхэм плIанэпэ щхьэхуэхэр щыхухах, апхуэдэ продукцэхэр зэрыщыIэм щыгъуазэ щэхуакIуэхэм кIуэ пэтми къахохъуэ, абыхэм я телъхьэхэри процент 73-м нобэкIэ щIегъу.
ЗэIущIэм щытепсэлъыхьащ органикэ сатум и Iуэхур дуней псом зэрыщефIакIуэм. Абы къызэрыщыхэщамкIэ, ди ерыскъыхэкI къабзэхэм хамэ къэралхэм увыпIэшхуэ нобэкIэ щаубыдыркъым, ауэ гугъэ щыIэщ зэман кIэщIым къриубыдэу а щытыкIэм зрагъэхъуэжыфыну. Абы ехьэлIауэ «Роскачество»-м иджыпсту лэжьыгъэхэр дрегъэкIуэкI Сауд Хьэрыпым, Китайм, Тыркум, Оманым, ЕАЭС-м хыхьэ къэралхэм. «Роскачество»-м и сертификатхэр япэ къэзылъыта хамэ къэралыр Катарырщ. Иджы, дызэрыт илъэсым икIэхэм ирихьэлIэу, ар ЕАЭС-м щыпхагъыкIыну гугъэхэр щыIэщ.
Къэбэрдей-Балъкъэрым и IуэхущIапIэхэм ящыщу органикэ продукцэхэр къыщIэзыгъэкIыу УФ-м Мэкъумэш хозяйствэмкIэ и министерствэм и реестрым щатхащ фадэхэкIхэр къыщIэзыгъэкI «Премиум», «Эльбрус Спиритс», мыIэрысэ жыг хадэхэр зезыхьэ «Гъавэ бэв» IуэхущIапIэхэр.
ХЬЭЩЫКЪУЕЙ Олег.
