Дагъыстэным и къалащхьэ Мэхъэчкъалэ иджыблагъэ щекIуэкIащ Кавказ Ищхъэрэм и щIыналъэхэм тхэквондомкIэ (ВТФ – Олимп джэгухэм хыхьэ лIэужьыгъуэмкIэ) я зэхьэзэхуэ. Мы гъэм мэкъуауэгъуэм и 14 - 17-хэм Красноярск къалэм щызэхэтыну Урысейм и еджакIуэхэм я I2-нэ спартакиадэм ягъэкIуэнухэр къызэрыхах зэпеуэу щытащ ар. 
Къэбэрдей-Балъкъэрым и командэр абы къыщыгъэлъэгъуауэ щытащ Кэнжэ къуажэм дэт «Пять колец» спорт академием и гъэсэнхэм икIи зэфIэкIыфIхэр къагъэлъагъуэу гуп зэпеуэм япэ увыпIэр щаубыдащ.
Щхьэзакъуэ зэIущIэхэм я ныбжьрэ хьэлъагърэ елъытауэ япэ увыпIэхэр къыщахьащ Тхьэмокъуэ Элинэ (кг 42-рэ), Хубуловэ Анжеликэ (кг 68+), Бицу Къантемыр (кг 59-рэ), Къэзанш Къасболэт (кг 63-рэ), Гъубжокъуэ Астемыр (кг 73-рэ), Уэзрокъуэ Аскэр (кг 78-рэ), Щоджэн Басир (кг 45-рэ), ПщыхьэщIэ Эстеллэ (кг 47-рэ), Орловэ Марие (кг 59-рэ), Пэфыф Эвелинэ (кг 59-рэ), Iусен Руслан (кг 37-рэ).
Зэпеуэм щытекIуахэм иратащ медалхэр, кубокхэр, саугъэт щхьэхуэхэр. Абы нэмыщI, Бицу Къантемыр нэхъ лъэщу абы къыщалъытащ, Унэжокъуэ Абдельджабар – тренер нэхъыфIу. 
Командэм дэлажьэхэр УФ-м щIыхь зиIэ и тренер Ахъмэт Амир, Унэжокъуэхэ Абдельджабаррэ Къантемыррэ, Бозиев Муслим сымэщ.
ХЬЭЩЫКЪУЕЙ Олег.