Кёп болмай Къабарты-Малкъар къырал университетде Жаш фахмуланы слёту болгъанды. Аны чеклеринде школчуланы арасында бардырылгъан Шимал Кавказны онекинчи ачыкъ олимпиадасында кеслерин айырмалы кёргюзтген   160 чакълы жаш адам эм устазлары  да саугъалагъа тийишли болгъандыла.  

Университет къурап олимпиада жыл сайын онбир предметден   бардырылады. Аны магъанасы Шимал-Кавказда жашагъан жаш адамаланы арасында хунерлилени тинтиргеди эм билеклик этергеди.

КъМКъУ-ну ректоруну борчун толтургъан Юрий Альтудов жыйылгъанланы алгъышлай, билимге, илмугъа  итиннгенлери ючюн ыспас этгенди.

 - Биз бийик технологиялы эм терк тюрлене баргъан дунияда жашайбыз. Бусагъатда жангы излемлеге келишген, болумну игилендираллыкъ, жетишимле болдураллыкъ  лидерле  керекдиле.  Университетни борчу бу жаны бла инсаннга кесин ачыкъларгъа болушургъады,- дегенди Юрий Альтудов.

Эсге сала айтсакъ, университетге кире туруп  олимпиадада хорлагъанлагъа  Бир къырал  экзаменлени эсеплерине къошакъ халда   балла къошуладыла.  

Хунерли жаш тёлюню  слёту,  хар замандача,  къууанч халда ётгенди. Белгили артистле эм студент биригиулени келечилери да жарыкъ номерлери бла къараучуланы кёллерин кётюргендиле. Ахырында жыйылгъанла бирден  университетни гимнин айтхандыла.

Бизни корр.