Гуманитар къэхутэныгъэхэмкIэ Къэ­бэрдей-Балъкъэр къэрал институ-тым накъыгъэм и 17-м щекIуэкIащ «Кав­казский текст Инны Кашежевой        в общероссийском поликультурном пространстве» конференцыр. Ар къы­зэрагъэпэщащ адыгэ усакIуэ, зэдзэ­кIакIуэ, Къэбэрдей-Балъкъэрым и Къэрал саугъэтыр зыхуагъэфэща Къэшэж Иннэ къызэралъхурэ мы гъэ­м илъэс 80 зэрырикъум и щIыхь-кIэ.

Институтым конференцыр ще­кIуэкIа и пэшым щагъэуват Иннэ и ­гъащIэмрэ гуащIэмрэ теухуа «Я продолженье той легенды, какой не может быть конца…» выставкэр.
Конференцым къыщыпсэлъащ Гу­манитар къэхутэныгъэхэмкIэ институ­тым и унафэщI Дзэмыхь Къасболэт, ­КъБР-м щIэныгъэхэмкIэ щIыхь зиIэ я        лэ­жьакIуэ, КъБР-м и ТхакIуэхэм я зэгу­хьэ­ныгъэм хэт, филологие щIэныгъэ­хэмкIэ доктор Гъут Iэдэм, филологие щIэ­ныгъэхэмкIэ доктор, профессор Ба­кIуу Хъанджэрий, филологие щIэ­ны­гъэ­хэмкIэ доктор Алъхъэс Светланэ, Гъуа­зджэхэмкIэ Кавказ Ищхъэрэ къэ­рал ­институтым гуманитар, соци­ально-экономикэ дерсхэмкIэ и кафед­рэм и профессор Торогельдиевэ Зухра, уса­кIуэ, драматург, «Горянка» га­зетым  и ­редактор нэхъыщхьэ Къа­ныкъуэ Зари­нэ.
Институтым къэбэрдей-шэрджэс литературэмкIэ и секторым и унафэщI Хьэвжокъуэ Людмилэ конференцым хэтхэм ягу къигъэкIыжащ Къэшэж Иннэ и гъащIэмрэ гуащIэмрэ.
Ар 1944 гъэм Москва къыщалъ­хуащ. УсакIуэр абы щыпсэуами, Къэбэрдей-Балъкъэрым гукIи псэкIи пыщIауэ, и лъэпкъэгъухэр фIыуэ илъагъуу щы-тащ. Щыхьэту урикъунщ Къэшэжым усэ куэд зэрытриухуар Къэбэрдей-­Балъ­къэ­рым­рэ абы щыпсэу цIыхухэмрэ.  1972 гъэм Горький Максим и цIэр зезыхьэ Литературэ институтыр Моск-ва къыщиухащ. УФ-м и ТхакIуэхэм я ­зэгухьэныгъэм хыхьащ 1967 гъэм. Къэ­шэжым и Iэдакъэм къыщIэкIащ уэрэд 300-м щIигъу. Республикэм щыпсэу- хэм фIыуэ ялъэгъуа «Возьми меня в Балкарию!» уэрэдым композитор Къашыргъэ Билал макъамэ щIилъхьащ. И уэрэдхэр жаIэу щрагъэжьам, Иннэ и ныбжьыр илъэс 22-рэ къудейт зэры­хъур. 
Теплъэ зэкIуж зиIэ ди лъэпкъэгъу усакIуэм и «Вольный Аул», «Кавказ ­надо мною», «На розовом коне», «Незаходящее солнце», «Белый тур», «Къеблагъэ», нэгъуэщI и усэ тхылъхэр тхылъеджэ  куэдым  ягу дыхьащ, щIэупщIэ ини яIащ, нобэр къыздэсми цIыхухэм зэIэпах. Къэшэж Иннэ хэлъхьэныгъэфI хуищIащ республикэм, къэралым я ­литературэхэм. Абы и тхыгъэ куэд ­триухуащ Кавказымрэ Къэбэрдей-Балъ­къэрымрэ. «Возьми меня в Бал­карию», «Отыщи  мне  лунный  камень», нэгъуэщI и уэрэдхэр цIыхубэм фIыуэ  ялъэгъуащ. «Правда» тхылъ тедзапIэм (Москва) 1988 гъэм къыдигъэкIащ Къэ­шэж Иннэ и «Время вслух» тхылъыр. ЦIыхугъэр, пэжыгъэр, гуапагъэр щып­хышащ абы и усэхэм. 1991 гъэм  къы­кIэлъыкIуащ «Стихи от Прекрасной Дамы» усэ тхылъыр. Иннэ 2000 гъэм ­дунейм ехыжами, ар дэркIэ псэущ, и ­IэдакъэщIэкIхэм деджэхуи тщыгъупщэнукъым.
Зэхыхьэм Иннэ и усэхэм къыщеджащ, и псалъэхэр зыщIэлъ уэрэдхэр щыжа­Iащ. Конференцым хэта щIэныгъэлIхэм Къэшэж Иннэ и тхыгъэхэм зыхуагъэзэху ар зэращымыгъупщэнур къыхагъэщащ, усакIуэм и творчествэм теухуа  я къэхутэныгъэхэмкIэ зэдэгуэшащ икIи яубзыхуащ «Къэшэж Иннэ и тхыгъэхэм доджэ» зэхыхьэр гъэ къэс институтым къыщызэрагъэпэщыну.
ТЕКIУЖЬ Заретэ.
Сурэтыр  Къарей  Элинэ  трихащ.