Тюнене Шимал Кавказны жаш тёлюсюню «Машук-2019» онунчу форумуну «Проективное общество» деген темагъа аталгъан экинчи смени бошалгъанды. Анга жаш журналистле, блогерле, студентле, чыгъармачы жаш тёлю биригиулени, жамауат маданият, волонтёр араланы келечилери, архитекторла - битеу да мингнге жууукъ жаш адам къатышхандыла. Ала къоруулагъан проектлени саны юч жюзге жууукълашханды, деп билдириледи форумну пресса-арасындан.
Бир ыйыкъны ичинде машукчула спортдан эришиулеге, интеллектуал оюнлагъа, викториналагъа эм конкурслагъа къатышхандыла. Билим бериу программаны юсюнден айтханда, ары «Про Дружбу», «Про Добро», «Про Наследие», «Про Медиа», «Про Города» эм «Про Развитие» деген бёлюмле киргендиле.
Кюн сайын форумчуланы белгили къуллукъчула, жамауат организацияланы келечилери, предпринимательле, спортчула, актёрла эмда башхала жокълагъандыла. Сыйлы къонакъланы санында РФ-ни Президентини СКФО-да толу эркинликли келечиси Александр Матовников, «Роскосмос» къырал корпорацияны таматасы Дмитрий Рогозин, РФ-ни спорт министри Павел Колобков, РФ-ни Тыш къыралла бла ишлени министерствосуну Информация эмда басма департаментини таматасы Мария Захарова, РФ-ни Президентини Администрациясыны таматасыны орунбасары Магомедсалам Магомедов, Миллетлени ишлери жаны федерал агентствону таматасы Игорь Баринов, РФ-ни кенгешчиси, Президентде Граждан обществону айнытыу эм адамны эркинликлери жаны бла советни таматасы Михаил Федотов болгъандыла.
Аладан сора да, белгили хоккеист Вячеслав Фетисов, космонавтла Сергей Крикалёв бла Сергей Залётин, РФ-ни Президентинде Сакъатланы ишлери жаны бла комиссияны келечиси, арбачыкъда жюрюген тиширыуланы арасында «Мисс мира-2013» даражагъа тийишли Ксения Безуглова, «English First» халкъла аралы билим бериу араны таматасы Эдуард Балдаков, чекленнген онглары болгъанланы арасында армрестлингден дунияны онтёрт кере чемпиону Ольга Бунина, КВН-ден «Сборная РУДН» къауумну келечиси, актёр, Арарат Кещян, «Comedy Production» клубну толтуруучу продюсери Алан Батаев эмда башхала тюбешиулеге келгендиле эм кеслерини жетишимлерини юсюнден айтхандыла.
Онунчу «Машук» иги да тюрленнгенди – къуралыу халын, билим бериу программасыны байлыгъын, жангыртылгъан инфраструктурасын эмда анга къатышханлагъа энчи эс бурулурча этилгенин белгилеп айтырчады. Бу жол жаш адамла къайсы лекциялагъа, консультациялагъа, тюбешиулеге, жыйылыулагъа барыргъа сюйгенлерин кеслери сайлагъандыла. «Машук» игилендириле барады, аны бла бирге анга къатышханла да тюрленедиле», деп белгилегенди форумну таматасы Дмитрий Донецкий.
Быйыл лагерьге СКФО-ну бла къыралны уллу компанияларыны келечилери чакъырылгъанын да жангылыкъладан бирине санаргъа боллукъду. Ала жаш специалистле тамамларча сынау халда «кейсле» бергендиле. Аланы арасында эм игилеге уа урунургъа онг табылгъанды. Сёз ючюн, эки сменден да онбир адам ишлерге, эллиси уа стажировка ётерге чакъырылгъандыла.
Экинчи смен «Город 312» белгили къауумну уллу концерти бла бошалгъанды. Ючюнчю смен а бюгюнден башлап 30 августха дери ишлерикди. Ол «Я лидер» деген темагъа жораланнганды. Анга жамауат организацияланы, студентлени, проектлени, журналистлени, блогерлени, конкурсланы лидерлери къатышырыкъдыла.
