Орта кюн республикабызда Россейни Къырал байрагъыны кюнюн къууанчлы белгилегендиле. Нальчикде уа байрам "Мен сени сюеме, Россей!" деген ат бла  бардырылгъанды. Ол 400-жыллыкъны майданында башланнганды. Аны КъМР-ни Жарыкъландырыу, илму эм жаш тёлюню ишлери жаны бла министерствосу, бу ведомствону Кёп функциялы жаш тёлю арасы къурагъандыла.
Онеки сагъатха майданнга, къолларында уллу эм гитче байракъларын чайкъалта, кёп адам келгенди. Аланы араларында Къабарты-Малкъар къырал университетни, медицина колледжни, къырал аграр университетни студентлери, Бахсан, Урван, Зольск районланы школчулары, волонтёрла, юнармиячыла, жамауат организацияланы келечилери да болгъандыла. Бизде окъугъан тыш къыраллыла да кёп эдиле.
Жашла бла къызла узунлугъу он, кенглиги да алты метр болгъан юч тюрсюнлю къумачны кенг жайып, Ленин проспектден башлап "Жашасын, деменгили Россей!", "Жашасын кёп миллетли республика - Къабарты-Малкъар!", "Бирликдеди кючюбюз!" деген эм башха чакъырыуланы да бир аууздан айтып, Къабарты орамгъа ётгендиле эмда "Победа" кинотеатрны къатында тохтагъандыла. Алайда уа бирге суратха да тюшгендиле.
Ол кюн Нальчик шахар округну администрациясыны маданият бёлюмю къурагъан акциягъа да аслам жаш адам къатышханды. Жарыкъ кёллю жашла бла къызла уллу орамлада, солуу паркда болуп, юч тюрсюнлю ленталаны бирлени къолларына бергендиле, башхаланы кёкюреклерине тюйрегендиле. Ол кюн ала триколорчукъладан минг бла жарымын юлешгендиле.
Ингир алада уа паркда, Чай юйчюкню аллында майданда, уллу концерт башланнганды. Анга республикада белгили жырчыла, сабий тепсеу коллективле да къатышхандыла. Ызы бла жаш адамла юч къауумгъа юлешиннгендиле: "Триколор", "Россия", "Патриотла".
Сора викторина башланнганды. Анга къатышханлагъа къыралны байрагъыны, башха белгилерини да тарыхларыны, башха шартларыны, алагъа жораланнган жырланы юслеринден эмда кёп башха соруулагъа да жууапла берирге тюшгенди. Хорлагъанла саугъала къоллу болгъандыла.