Кёп болмай ишчи жолоучулукъларыны чеклеринде Россейни Медицина университетини келечилери Къабарты-Малкъарны жокълагъандыла. Алагъа РФ-ни сыйлы врачы, медицина илмуланы доктору, профессор Рамаз Гветадзе башчылыкъ этгенди. Ала биринчи Нальчикде Республикалы стоматология арасында болгъандыла. Ызы бла Нарткъалада, Басханда эм Терекде поликлиникалада болум бла шагъырейленнгендиле.

Къонакъла сабийлеге, абаданлагъа болушлукъ, кадрла бла жалчытыу, жумушланы тизмеси, оборудованияны хайырланыу не халда болгъанларына эм башха шартлагъа да эс бургъандыла. КъМР-ни Саулукъ сакълау министерствосунда коллегалары бла да тюбешгендиле. Аны кезиуюнде республиканы стоматология бёлюмюню ишине бюсюрегенлерин билдиргендиле. Ол санда поликлиникалада саусузгъа тап болурча онгла къуралгъанларын - электрон халда алгъадан специалистге жазылыргъа жарагъанын, бир бирни чырмамазча мадар этилгенин, ким да ангыларча билдириуле бла жалчытылыннганларын махтаугъа тийишлиге санагъандыла. Бютюнда бюгюннгю техника эм технологияла тири хайырланнганларын, саулай алып айтханда, жангы излемледен артха къалмазгъа итиннгенлерин энчи белигилегендиле.

Кенгешни кезиуюнде Къабарты-Малкъарда стоматология службаны ишини юсюнден толу отчёт да этилгенди.

Ахырында къонакъла магъаналы эсгертиуле этгендиле. Ол санда мындан арысында бёлюм айнырча тамамланыргъа тийишли жумушланы да сагъынмай болмагъандыла. Ол да даражалы экспертлени жанындан уллу себеплик болгъанын энчи чертирчады.  

Курданланы Сулейман.