Тюнене Нальчикде «Ёмюрлюк от» мемориалны къатында Уллу Ата журт урушну кезиуюнде Курск дугада гитлерчи аскерле ууатылгъан кюннге аталып митинг бардырылгъанды. Анга бир да болмагъанча кёп адам къатышханды, аланы араларында жаш адамла аслам эдиле.
Митингни урушну бла урунууну ветеранларыны шахар советини таматасы Абдуллаланы Мустафа ачханды.
-Ма быллай исси кюн баргъан къанлы сермешде бизни аскерчилерибиз жанларын, къанларын аямай къазауат этгендиле эмда битеу дуниягъа германлы фашизм хорланырыгъын кёргюзтгендиле. Ата журтну аскер тарыхына алтын харфла бла жазылады бизни халкъларыбызны немисли ууучлаучула урушда этген батырлыкълары бла кишиликлери»,- деп, Абдулла улу ол къазауатда жоюлгъанланы эсгерирге келгенлеге жюрек ыразылыгъын билдиргенди. Юнармиячылагъа бла пионерлеге бютюн уллу ыспас этгенди.
Жыйылгъанланы алларында дагъыда Запасдагъы офицерлени миллет ассоциациясыны таматасы Аталаны Жашарбек, «Боевое братство» битеуроссей жамауат организацияны регион бёлюмюню башчысы Гелястанланы Барасбий, запасдагъы эмда резервдеги офицерлени биригиуюню халкъла аралы консультатив комитетини генеральный секретары Анатолий Кумахов, ветеран, биринчи рангалы капитан Башир Сокуров, республикалы ДОСААФ-ны председателини орунбасары Хусен Мацухов да сёлешгендиле. Митингни ахырында анга келгенле барысы да, бир минутну шош сюелип, къанлы урушда жоюлгъанланы эсгергендиле, мемориалгъа гюлле да салгъандыла.
