Прохладнэ районым и полицейхэмрэ жылагъуэ лэжьакIуэхэмрэ Прохладнэ къалэм щыпсэу, Хэку зауэшхуэм и ветеранхэу Ерохинэ Аннэ, Шайн Владимир, Головин Владимир сымэ я деж щыIащ икIи ТекIуэныгъэм и махуэшхуэмкIэ ехъуэ­хъуащ.

Iуэху гуапэм хэтащ Прохладнэ районым къэрал кIуэцI IуэхухэмкIэ и органхэм я ветеранхэм я Жылагъуэ советым и тхьэмадэ, милицэм и полковник Савинов Алек­сандр­рэ къудамэм дэлажьэ Жылагъуэ советым и унафэщI Клюй Андрейрэ. 
Урысей МВД-м и Прохладнэ къудамэм и унафэщI, полицэм и полковник Бейтыгъуэн Рустам ветеранхэм махуэшхуэмкIэ ехъуэхъуащ, узыншэу адэкIи куэдрэ псэуну зэригуапэр яжриIащ. Абы фIыщIэшхуэ яхуищIащ хахуа­гъэрэ лIыгъэрэ къагъэлъагъуэу Хэкур зыхъума ветеранхэм.  
ЗэIущIэм и къызэгъэпэщакIуэхэм ветеранхэм IэщIалъ­хьащ республикэ ОВД-м и ветеранхэм я щIыналъэ жылагъуэ IэнатIэм къыбгъэдэкI фIыщIэ письмохэмрэ фэеплъ саугъэтхэмрэ. 
Ветеранхэм хьэщIэхэм фIыщIэ хуащIащ я нэIэ къа­зэрытетым, гулъытэ къызэрыхуапщIым папщIэ икIи полицэм и лэжьакIуэхэм къулыкъум ехъулIэныгъэхэр щаIэну зэрагуапэр жраIащ.  
БАХЪСЭН  Азэмэт.