Къабарты-Малкъарны башчылары школчуланы китапла бла жюз процентге жалчытыуну къайгъысын этедиле. Аны бла байламлы быйыл белгили федерал изданияладан 400 минг китап сатып алынырыкъды. Бюгюнлюкде аны биринчи къаууму келтирилгенди. Жууукъ заманда ала школ библиотека фондланы толтурлукъдула.
- Быйыл школчуланы хакъсыз китапла бла жюз процентге жалчытыргъа таукелбиз. Аны ючюн деп къыралны уллу изданиялары бла келишимле да этилгендиле. Жыл сайын окъуу китапла алыргъа республиканы бюджетинден 43-45 миллион сом бёлюнеди, ол а окъуучуланы жаланда 60-70 процентине жетеди. Андан сора да, школ библиотекалада пособияланы иги кесеги тозурагъандыла, жангы программагъа кёре уа, аланы алышыргъа керек болгъанды. Ол уллу проблеманы къошакъ ахчаны хайырындан тамамларгъа онг чыкъгъанды,- деп билдиреди КъМР-ни жарыкъландырыу, илму эмда жаш тёлюню ишлери жаны бла министри Ауес Кумыков.