Терк районда кёп эллени жери, кюн да иги болгъаны себепли, харбыз ёсдюрюу бек файдалы ишге саналады. Муниципалитетни администрациясындан билдиргенлерича, аграрийле быйыл аны 150 гектарда ёсдюредиле. Асламысы - Дейское, Плановское, Интернациональное, Урожайноедеди. Бир-бир участкалада гектардан 40-50 тонна продукция аладыла.
Быллай бахчачылыкъ бла кюрешген элчи-фермер мюлкледен бири Интернациональное элде орналады. Аны башчысы Измудин Хашев агъач мюлк бла байламлы усталыкъгъа окъугъанды, алай урунуу жолун а харбыз ёсдюрюу бла байламлы этгенди.
Бу культураны ол биринчиден 30 соткагъа салгъан эди. Иши айный баргъаны бла жерле да кенгертиле баргъандыла. Бюгюнлюкде Измудин ортакъда 32 гектарны тутады. Анга тынгылы къарайды, агротехниканы излемлерин жик-жиги бла тамамлайды. Анда асламысында харбыз ёсдюреди, соядан, жилекден, нартюхню гибрид тюрлюлеринден да хайырын кёреди.
Озгъан къыш къар хазна жаумагъаны ючюн жай айлада къургъакълыкъ боллугъуну прогнозу этилген эди. Сынамлы арендатор эки гектар жерде суу сугъарыу система орнатып, анга аллындан окъуна хазырланнганды. Этилген къоранчлары толусунлай къайтарылгъандыла: шёндю ол бахчада харбызны алты сорту битеди.
«Бу иш тынч тюйюлдю. Бирде заранлы хансланы къолунг бла тазаларгъа да тюшеди», - дейди предприниматель. Алай агротехниканы эмда севооборотну сансыз этмей, урлукъну игисин хайырланып, ишни да эринмей тынгылы этсе, салыннган къыйыны адамгъа иги файда бла къайтарылады.