Жаш тёлюню ишлери жаны бла федерал агентствону «Россейни маршрутлары» деген проектини баш борчу - Россей Федерацияда ич туризмни айнытыргъады. Кёп болмай аны бла байламлы биринчи экспедиция бардырылгъанды. Аны магъанасы поход жолланы кёбейтирге, миллетлени араларында байламлыкъланы кючлерге эм саулай Шимал Кавказны курортларыны атларын айтдырыргъады.
Экспедициягъа Къабарты-Малкъардан, Къарачай-Черкесден эм Ставрополь крайдан 25 блогер, журналист эмда башхала къатышхандыла.& Ала, РФ-ни Президентини СКФО-да толу эркинликли келечиси Александр Матовников бла тюбешип, туризмни айнытыуну юсюнден сёлешгендиле.
Ол санда жаяу жюрюген жангы маршрутланы салыуну, унутулгъанларын къайтарыуну, курортланы къурулушун бардырыуну, Шимал Кавказдан Къара тенгизге жол ачыуну юсюнден айтхандыла. Бу жаны бла блогерле да уллу къошумчулукъ этериклери белгиленнгенди. Экспедицияны келечилери «Машук» лагерьде да болгъандыла, туризм бла байламлы проектлеге да къатышхандыла. Экинчи кюн Бермамытда тангнга тюбеп, тау бетледе скейтледе учхандыла, кече уа Минги тауну жулдузлу кёгюн суратха алгъандыла.
- Туризмни айнытыу къыралгъа, регионлагъа да уллу магъананы тутады. Бу жаны бла къырал бек байды. Кавказны сейир табийгъаты уа анга энчи къыймат къошады, - дегенди экспедицияны келечиси Мария Мамаева.
Быйыл кюз артында Москвада, Кавказгъа аталып, кёрмюч ётерикди. Анда экспедицияны кезиуюнде тюшюрюлген суратла, фильмле да кёргюзтюллюкдюле.
