Айырыулагъа хазырланыу чырмаусуз, законнга кёре барады.

Къабарты-Малкъар Республиканы Парламентини алтынчы чакъырылыууна депутатланы сайлаугъа хазырланыу баргъаны бла байламлы республиканы Айырыу комиссиясын Россейни Ара айырыу комиссиясыны (ЦИК) члени юридический илмуланы доктору Евгений Колюшин келгенди. Ол регионда политика партияланы башчылары бла тюбешгенди.КъМР-ни Айырыу комиссиясыны башчысы Вячеслав Гешев бек алгъа Евгений Ивановични партияланы башчылары бла танышдыргъанды. Ол а, талай заманны бизни республика бла ишлегенин билдире, ЦИК энди боллукъ айырыула бла артыкъ байламлы болмагъанын белгилегенди. Ала толусунлай субъектни кесини ахчасына бардырыладыла, аланы ётдюрюу ючюн жер-жерли айырыу комиссия жууаплыды.
Алай эсе да, ЦИК къыралны къалайында да адамланы айырыу эркинликлери къалай сакъланнганларына къарайды. Мен билгенден, бусагъатда сизде, къоншуларыгъызгъа ушамай, айырыула аллы иш чырмаусуз барады. Чурумла чыкъсала, Москва аланы кетериуге къатышырыкъды, - дегенди.
Ызы бла партияланы башчылары алада хазырланыу не халда болгъанын билдиргендиле. РФ-ни Коммунист партиясыны республикалы бёлюмюню таматасы Борис Паштов айырыула бла байламлы уллу иш тамамланнганын, тыйгъычла болмагъанларын чертгенди. «Бизден 111 кандидат бар эди, документлени жарашдыралмай, сёз ючюн, эртте банкда счёт ачып, жабаргъа уа унутуп, талайы кетгенди. Чыкъгъан жангылычланы заманында тюзетирге кюрешгенбиз».
«Единая Россияны» регион исполкомуну таматасы Дмитрий Парафилов айтханыча, аланы 118 кандидатындан 115-си эсепге тюшгендиле, ючюсю айырыуладан чыкъгъандыла. «Муратыбыз - Парламентде болгъан жерлерибизни санын кёбейтиргеди. Бу айырыуланы жетишимли, башха партияланы келечилерине да хурмет эте, ётдюрюрбюз деп  ышанама», - дегенди ол.
«Зелёные» экология партияны регион бёлюмюню башчысы Сафарбий Шхагапсоев аланы биригиулери бек керек болгъанын белгилегенди. «Партиябызгъа 51 адам киреди, аладан 25 проценти экология, табийгъат байлыкъланы хайырланыу, медицина эм башха илмуланы докторлары эм кандидатларыдыла, академикле да бардыла. Къалгъанлары врачла, инженерле, башха усталыкълада специалистледиле, жыл санлары бла жашла, абаданла да тюбейдиле», - дегенди ол.
ЛДПР-ни регион бёлюмюню координатору Владимир Безгодько бла кёп болмай къуралгъан «Гражданская Платформа» политика партияны регион исполкомуну  таматасы Аслан Афаунов да, республиканы Айырыу комиссиясыны жанындан битеу керекли информация, консультация болушлукъну алгъанларын айта, алада хазырланыу тийишлисича баргъанын билдиргендиле.
Жыйылыуну ахырында Евгений Колюшин айырыуланы юсюнден законодательство къыйын болгъанын, ол дайым тюрленнгенлей тургъанын эсгертгенди. Субъектлени талайында кандидатла бир бирлерин сюдге бергенлерин, къагъытла бла байламлы иш да кёп заманны алгъанын айтханды. Аны хатасындан гражданлагъа аз эс бёлюнеди, сизде алай болмагъаны къууандырады, дегенди.

Кульчаланы Зульфия.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.