Культураны болумуну эмда айныууну мадарларыны юсюнден ачыкъ сёлешиу.

Тюнене Нальчикде Тимбора Мальбахов атлы миллет библиотеканы уллу залында КъМР-ни Башчысыны къуллугъун болжаллы халда толтургъан Казбек Коков республикада культурада ишлегенле бла тюбешгенди. Ары район администрацияланы маданият бёлюмлерини таматалары, жазыучула, художникле, архитекторла, жырчыла, театрланы артистлери, искусство школлада ишлегенлени къаууму келгендиле.
Жыйылыуну Казбек Валерьевич кеси ачханды. Ызы бла жашауда культураны бийик магъанасыны, борчларыны юслеринден айтханды. «Маданият - жашауну алгъа элтген кючдю. Ол, тин хазнабызны бир тёлюден бирине ётдюре, жамауатха алай къуллукъ этеди. Къабарты-Малкъарда аны айнытыр жаны бла кёп тюрлю программала бардыла. Театрда, адабиятда, сурат этиуде, жыр-тепсеу жаны бла да бизге ишлерин иги билген адамла керекдиле. Миллет культурабызгъа аллай кадрла хазырлау, фахмулу жаш адамлагъа билеклик этиу – бизни борчубузду», - деп, республиканы оноучусу кёчюп айланнган маданият араланы, электрон библиотекаланы оноулары да этиллигини юсюнден билдиргенди.
Библиотеканы таматасы Анатолий Емузов кесини, анда ишлегенлени, ары жюрюген алты минг окъуучуну да атларындан Казбек Валерьевичге ыспас этип,  аны атасы алгъын тохташдыргъан тёрелени жангыртханына къууаннганын билдиргенди. Андан сора да, ол китапханада этилген иги ишлени юслеринден айтханды: былтыр анда 350 мероприятие бардырылгъанды, ол а белгиленнген мардадан иги да асламды.
Къабарты театрны художестволу башчысы Руслан Фиров, культура айнымагъан жерде урушла, тюйюшле, къозгъалыула, адам ёлтюрюуле окъуна кёп болгъанларын эсгерте, Уллу Ата журт уруш бошалгъан жыллада Японияны юлгюге келтиргенди. Сора, миллет тиллени жарсыулу болумларына кёчюп, ол магъаналы ишни Жарыкъландырыу, илму эмда жаш тёлюню ишлери жаны бла министерство бла Культура министерство жаланда бирге онгларгъа боллукъларын чертгенди. Ызы бла ол правительствону маданиятда ишлегенлеге бёлген стипендияларыны аз болгъанларыны юслеринден да айтханды.
Къулийланы Элизат Малкъар театрны ремонту узакъгъа, юч жылгъа, созулгъанын эсгертгенди. Казбек Валерьевич: «Аны юсюнден сагъыш этип турама. Узакъ созмай, заман табып, кесим барып къарарыкъма аны халына. Аны ремонтун болдурургъа республика ахча табарыкъды», - деп ийнандыргъанды.
Художник Герман Паштов Казбек Коковха эм миллет библиотекагъа кесини китапларын саугъа этгенди.
Белгили режиссёр, НОТР «Нальчик» телевиденияны башчысы Владимир Вороков бла КъМР-ни Композиторларыны союзуну председатели Джабраил Хаупа бизни халкълагъа миллет культураны айныуу не магъана тутханыны юсюнден сёлешгендиле.
КъМР-ни, КъЧР-ни да халкъ поэти Зумакъулланы Танзиля бу къатыш кезиуде культурагъа эс бёлгени ючюн Казбек Валерьевичге ыразылыгъын айтханды. Ол да, атасыча, тёгерегине республикагъа хайыр келтирлик адамланы жыйгъанына ыразы болгъанын да билдиргенди.
Элбрус район администрацияны культура бёлюмюню таматасы Толгъурланы Жаннет алада халны, жангы программалагъа къатышханларыны, аланы юслери бла алагъа къолай да келгенин билдиргенди. Аланы къайгъы этдирген жаланда элледе культура мекямлада ишлегенлени саны аз болгъаныды. «Ала асламында юч адамдыла - юйретгенле да, мюлк ишчиле да. Ол жанына къарарыгъызны тилейме», – дегенди ол.
КъМР-ни Жазыучуларыны союзуну правленини таматасы Беппайланы Муталип белгили адамланы юбилейлерин ётдюрюуню проблемаларын кётюргенди, Алим Кешоковну юйюнде музей къурауну юсюнден да оюмун айтханды.
Тёбен Куркужинде М. Кипов атлы искусство школну директору Рита Кужева, кеси этген тинтиулеге кёре, республиканы эллеринде быллай школлада окъугъанланы саны азды. Ала белгиленнгенден жаланда алты процентин толтурадыла. Бир-бир элледе аллай школла жокъдула.
Жыйылыуда дагъыда РСФСР-ни халкъ артисти Наталья Гасташева, КъМР-ни Художниклерини союзуну председатели Геннадий Темирканов, республиканы Архитекторарыны союзуну таматасы Сергей Логоватовский эм башхала сёлешгендиле эмда республиканы атын иги бла айтдырыр ючюн, хар бири къарыуларын, фахмуларын да аямай кюрешириклерине ышандыргъандыла.
Ахырында Казбек Коков, быллай тюбешиуле муну бла чекленмезликлерин, алыкъа айтырыкъ, этерик зат да кёп болгъанын чертип, келгенлеге ыразылыгъын билдиргенди.

Мусукаланы Сакинат.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.