Адыгэ щIалэхэм иджы­-ри зы дыжьын медаль ­къахуихьащ Эстонием и къалащхьэ Таллинн мы махуэхэм щекIуэкIа спорт бэнэкIэмкIэ щIалэгъуалэм я дунейпсо чемпионатым. Килограмм 82-м нэс зи хьэлъагъхэм я зэпеуэм абы вице-чемпион щы­хъуащ Гъуэ­ныбэ Iэуес.
Зи ныбжьыр илъэс 21-м нэмысахэм алыдж-урым бэ­нэкIэмкIэ я зэхьэзэхуэм джы­лахъстэней щIалэм фIы дыдэу зыкъыщигъэ­лъэгъуащ. И хьэрхуэрэгъу псоми хэпщIыкIыу ефIэкI­-ри, ар финалым нэсащ. Ди жагъуэ зэрыхъущи, абы къыщытекIуащ Мэжэрым щыщ Токаш Иштван. Ап­хуэдэу щыт пэтми, дыжьын медалыр дунейпсо зэпеуэм щызыIэрыбгъэхьэныр ехъу­лIэныгъэшхуэщ икIи Гъуэ­ны­бэм и лъагапIэ инхэм ар я щIэдзапIэ хъуну дыщо­гугъ.
Финалым къыщытекIуа венгр щIалэмрэ Iэуесрэ нэхъапэми зэпэщIэтащ. 2017 гъэм Босниерэ Герцогови­нэрэ я къалащхьэ Сарае­- вэ щекIуэкIа ныбжьы­щIэхэм Европэм и чемпионатым ахэр къыщыхэжаныкIащ. Абы щыгъуэм, килограмм 76-м нэс зи хьэлъагъхэм я зэпеуэм ­Гъуэныбэм дыщэ медалыр къыщихьауэ щытащ, Куржым щыщ Цопурашвили ­Георгий финалым 2:0-у щыхигъащIэри. Токаш Иштван ещанэ увыпIэр иубыдауэ арат. А тIум я зэныкъуэ­къуныгъэм ирагъэжьа къудейщ икIи бэнэкIэ удэзыхьэх дяпэкIи къа­гъэлъэ­гъуэну худогъэфа-щэ.
Нэхъапэм къэралми Европэми щытекIуа, иджы дуней псом и вице-чемпион Гъуэныбэ Iэуес и гъэсэнщ тренер гъуэзэджэ Белгъэ­рокъуэ Эдуард.
Тхьэмахуэ блэкIам Таллинн щекIуэкIа щIалэгъуа­лэм я дунейпсо чемпионатыр тхуэугъурлащ. Фигу къэдгъэкIыжынщи, бэнэкIэ хуитымкIэ килограмм 86-м нэс зи хьэлъагъхэм я зэпеуэм хэта Шыбзыхъуэ Алики ды­жьын медалыр абы щы­зы­Iэригъэхьащ.
НэгъуэщI ди зы лъахэгъу­ми Эстонием щыIа дунейпсо зэпеуэм зыкъыщигъэ­лъэгъуащ. Алыдж-урым бэ­нэкIэмкIэ килограмми 130-м нэс зи хьэлъагъхэм я зэ­пеуэм, ди жагъуэ зэрыхъущи, КIэмпIарэ Марат финалым и Iыхьэ плIанэм къыщагъэувыIащ.