Проектлерин къоруулагъандыла, билимлерин ёсдюргендиле, жангы шуёхла тапхандыла.

Шимал Кавказны жаш тёлюсюню «Машук-2019» онунчу форумуну биринчи смени бошалгъанды. Ол «Профессионалы РФ» деген темагъа аталгъанды.
Анга СКФО-дан бла башха регионладан эм тыш къыралладан мингден аслам жаш адам къатышхандыла. Аланы асламысы - бизнесменле, алимле, IT-жаны бла специалистле, туризм, чыгъармачылыкъ бёлюмледе уруннганла, жаш тёлю организацияланы келечилеридиле, - деп билдириледи форумну пресса-арасындан.
Сау ыйыкъны ичинде ала билимлерин ёсдюргендиле, спортда эришиулеге, интеллектуал оюнлагъа, викториналагъа эм конкурслагъа къатышхандыла. Билим бериу программа «Про Бизнес», «Про Туризм», «ПроIT», «Про Технологии», «ПроРазвитие» бёлюмлеге жораланнганды.
Баш тема адамны профессионал жаны бла айнытыугъа эмда болгъан амалланы жашауда хайырланыугъа жораланнганды. Бу жаны бла соруулагъа отузгъа жууукъ тренер бла жыйырмадан аслам уллу предприятияны келечилери жууапла бергендиле. Ишчи усталыкъла бла байламлы «кейслени» эм иги тамамлагъанла уа «Курорты Северного Кавказа», «Цифроград», «Лукойл», «Ростелеком», Россети», «Сбербанк» эм «Центр развития туризма» дегенча уллу компанияла да стажировканы ётерге чакъырылгъандыла.
Жети кюнню ичинде жаш адамла 180-ге жууукъ лекцияла бла мастер-класслагъа къатышхандыла. Чыгъармачылыкъ эм спорт жаны бла кючлерин сынарча уа форумда отуз майдан ишлегендиле. Кюн сайын ала бла тюбеширге къуллукъчула, жамауат эмда маданият организацияланы келечилери, белигили спортчула эмда башхала келгендиле.
Сыйлы къонакъланы санында РФ-ни Президентини СКФО-да толу эркинликли келечиси Александр Матовников, РФ-ни табийгъат байлыкъла эмда экология министри Дмитрий Кобылкин, миллетлени ишлери жаны бла федерал агентствону таматасы Игорь Баринов, Къырал Думаны депутатлары эм субъектлени башчылары болгъандыла. Андан сора да, космонавт Валерий Токарев, белгили гимнаст Александр Немов, театрны бла кинону актёрлары Анатолий Журавлёв бла Александр Носиков, биатланист-лыжачы Сергей Чепиков, КВН-ден «Сборная РУДН» къауумну капитаны, медиа- продюсер Сангаджи Тарбаев, Дагъыстанны самбодан жыйымдыкъ къауумуну тамата тренери Абдулманап Нурмагомедов эмда башхала бла тюбешиуле да бек сейир ётгендиле.
Форумну эм магъаналы кесегине уа, хар замандача, проектлени къоруулауну санаргъа боллукъду. Биринчи сменде грант алырча конкурсха къатышыргъа сюйгенлерин 274 адам эм коммерциялы болмагъан организацияладан да 29 заявка берилгенди. Ишле тогъуз номинациягъа «Студентлени башламчылыкълары», «Добровольчество», «Социал лифтлени айнытыу», «Жаш адамланы чыгъармачылыкъ жаны бла башламчылыкълары», «Патриот болургъа юйретиу», «Спорт, ЗОЖ,туризм», «Жаш тёлюню арасында аман ишлени къурутурча  профилактика бардырыу эм миллетлени арасында байламлыкъланы кючлеу», «Юйюрню даражасын кётюрюу» эм «Жаш тёлю медиа». Аладан эм игилерин экспертле айыргъандыла.
Аны бла бирге форумда «Проектлени ярмаркасы» да ишлегенди. Анда бирси жыллада грантлагъа тийишли болгъан ишле кёргюзтюлгендиле.
Биринчи смен уллу концерт бла бошалгъанды. Бу жол къараучула бегирек да «Сплин» рок-къауумгъа бюсюрегенлерин да букъдурмагъандыла. Экинчи смен а 16 августдан башлап 23 августха дери ишлерикди. Ол «Проективное общество» деген темагъа аталлыкъды. Анга жаш журналистле, блогерле, студент эм жаш тёлю биригиулени, жамауат, маданият волонтёр араланы келечилери, архитекторла эм башхала къатышырыкъдыла.
Эсге сала айтсакъ, быйыл форум юч смен бла ишлерикди. Ол къууанч халда 30 августда жабыллыкъды.

Магометланы Сулейман.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.