Тюнене Казбек Коков Прохладна районну социал инфраструктура объектлеринде эм АПК предприятияларында болгъанды, Лесное элни суу бла тохтаусуз жалчытырча ишлени бардырылыуларына къарагъанды. Район властьла вопросну тамамларгъа къошакъ ырысхы бёлалгъандыла, бригадала скважинаны къазып башлагъандыла, ол жашаугъа кийирилсе, кёп жылланы жерин табып тургъан жарсыу кетерилликди.
Ол кюн КъМР-ни Башчысыны къуллугъун болжаллы халда толтургъан Къарагъач элни Маданият юйюне, Прималкинскоеде солуу араны да кёргенди. Алада «Жер-жерли Маданият юй» эм «Бусагъатдагъы излемлеге келишген шахар тийрени жарашдырыу» федерал проектлени жашауда бардырылыу чеклеринде мекямлагъа тынгылы ремонт этилгенди, таууш чыгъарыучу эм кинооборудование салыннганды, сахнала игилендирилгендиле, тийрелери тапландырылгъандыла.
Иш бла барыу жолоучулукъну чегинде Казбек Коков Къарагъачны сют заводуну производстволу ызларыны жангыртылыуларына эс бургъанды. Предприятие аш-азыкъ промышленность бёлюмде эм качестволу сют продукцияны тапдырыуда алчыладан бириди. Аны продукциясы, федерал эришиуню эсеплерине кёре, Россейни жюз ахшы товарыны тизмесине къошулгъанды.
Бюгюнлюкде, игилендириу программагъа кёре, 960 къумалы сауулгъан ийнеклеге комплекс ишлене турады, мирзеу сакъланыу жерни къурулушу ахырына жетдирилгенди. Предприятие толу кючюне ишлеп башласа, сют чыгъарыуну ёлчеми суткагъа 40 тоннагъа дери жетерикди, къошакъ урунуу жерле къураллыкъдыла (бусагъатда сют чыгъарыуну эм жарашдырыуну ёлчеми кюн сайын 12 тоннадан асламды, махкемеде ишлегенлени саны 190 адамды).
Федерал проектлени эм миллет программаланы чеклеринде быйылны ахырына дери Прохладна районда бир ненча магъаналы иш тындырыллыкъды, ол санда Прималкенское элде бла Солдатское станицада сабий садланы блогун, Саратовский хуторда фельдшер-акушер пунктну жашаугъа кийириу, Алтудда, Псыншокода, Къарагъачда юч спортзалны тынгылы ремонт этиу, Къарагъачда, Прималкинскоеде , Янтарноеде 17 арбазны бла 3 жамауат тийрени тапландырыу, Дальнее элде суу баргъан ызны къурулушу, 11 элни котельняларында жылыу жалчытыу оборудованияны жангы излемлеге келишгеннге алышындырыу, Черниговское, Учебное элледе маданият юйлени ремонтлары да.
