КъБР-м Къэрал кIуэцI IуэхухэмкIэ щыIэ министерствэм щекIуэкIащ 2018 гъэм и япэ мазихым я лэжьыгъэм кърикIуам щыхэплъэжа зэIущIэ. Абы хэтащ республикэ МВД-м дэлажьэ Жылагъуэ советым и унафэщI, Урысей Федера­-цэм щIыхь зиIэ и артист Балъкъыз ­Валерэ.

ЗэIущIэр Iуэху гуапэкIэ къызэIуахащ. КъБР-м щыIэ къэрал кIуэцI IуэхухэмкIэ министрым и къалэнхэр пIалъэкIэ зы­гъэзащIэ полицэм и полковник Мамхэгъ Назир Урысей МВД-м пщэрылъ къыщащIа къалэнхэр гъэзэщIэнымкIэ къазэ­рыдэIэпыкъуам папщIэ «За содействие МВД» бгъэхэIу дамыгъэмрэ «300 лет российской полиции» фэеплъ юбилей медалымрэ иритащ Урысей Федерацэм и Президентым и деж ЦIыхубэ хозяйствэмрэ къэрал къулыкъумкIэ щыIэ Урысей академием и профессор Ащхъуэт ­Анзор Мухьэмэд и къуэм.
АдэкIэ Мамхэгъ Назир зэпкърыхауэ тепсэлъыхьащ 2018 гъэм и мазихым я лэжьыгъэм кърикIуам, ещанэ мазищым къапэщыт къалэнхэм.
ЗэIущIэм щыхэплъащ щIэпхъаджагъэхэр сэтей къэщIынымкIэ я лэжьыгъэр зыхуэдэм, хабзэр къызэпауду наркотикхэкIхэр емыгъэщэным, гъуэгум щызекIуэхэм я гъащIэмрэ узыншагъэмрэ яхъумэным ехьэ­лIауэ къагъэсэбэп Iэмалхэм.
ЗэIущIэм къыщаIэта Iуэху псоми теухуа унафэхэр къащтащ.