Жангы законопроектни автору – Къырал Думаны депутаты, къоркъуусузлукъ эмда коррупциягъа къажау сюелиу жаны бла комитетини къауумуна кирген Адальби Шхагошев бу кюнледе Къабарты-Малкъарны право низамны сакълаучу органларында къуллукъ этгенле бла тюбешгенди. Ол къолда жарашдырылгъан чачдырылыучу затла ючюн жууапха тартыуну къатыландыргъан законопроектни Къырал Думада «Единая Россияны» фракциясыны эксперт эмда координация советлери дурус кёргенлерин, энди уа ол право низамны сакълаучу органла бла сюзюле тургъанын билдиргенди.
Шёндюгю законнга кёре, аскер сауутланы кеслери алларына жарашдырыу, тюрлендириу эмда жангыртыу, дагъыда бир къауум адам бирге болуп боеприпасла чыгъарыу ючюн сегиз жылгъа тутаргъа болады эмда 300 минг сом тазир салынады. Тюзетилген документ къабыл кёрюлсе уа, башында сагъынылгъан ишле ючюн жууапха тартыу къатыланады, аманлыкъчы къауумну эркинлиги 15 жылгъа сыйырылыргъа боллукъду.
Шхагошев акъыл этгенден, закон къабыл этилсе, право низамны сакълаучу эм къоркъуусузлукъну жалчытыучу органлагъа аманлыкъчы къауумгъа бла терроризмге къажау кюрешни бютюн къыйматлы этерге, адамланы жашауларына бла саулукъларына хата, къыралны экономикасына уа уллу заран салыргъа боллукъ чачдырылыучу затланы законсуз чыгъаргъанланы жолларын кесерге къошакъ онгла берликди. Аны бла бирге уа жамауат къоркъуусузлукъну жалчытыргъа эм россейлилени террорчулукъдан къоруулауну кючлендирирге къолдан келликди.