Налшык къалэм дэт Къэрал киноконцерт гъэлъэгъуапIэм щекIуэкIа зэхыхьэр теухуат Афганистаным советыдзэхэр къызэрырашыжрэ илъэс 35-рэ зэрырикъум.
Абы хэтащ республикэ унафэщIхэр, Хэку зауэшхуэмрэ Афган зауэмрэ я ветеранхэр, я къалэн ягъэзащIэу хэкIуэ- да зауэлIхэм я Iыхьлыхэр, депутатхэр, жылагъуэ лэжьакIуэхэр. Ахэр ирагъэблагъэу IуэхущIапIэм и пэIущIэм щызэхэтт кадетхэмрэ юнармием хэт ныбжьыщIэхэмрэ.
«Афган зауэр щекIуэкIа илъэсхэр хуэмурэ тпэжыжьэ мэхъу. Хэкум къащищIа къалэныр ягъэзащIэн папщIэ ди щIалэхэм хьэкъ къызытрагъэнакъым. Абы хэкIуэдахэм я лIыхъужьыгъэмрэ хахуагъэмрэ зэи дигу ихунукъым. Абыхэм я фэеплъыр уахътыншэщ!» - мыпхуэдэ псалъэхэмкIэ пшыхьыр къызэIуихащ зэхыхьэр езыгъэкIуэкIа Аттаев Азнор.
Абы псалъэ иритащ КъБР-м и Iэтащхьэм и Администрацэм и УнафэщI Къуэдзо-къуэ Мухьэмэд. Ар къеджащ щIыналъэм и Iэтащхьэ КIуэкIуэ Казбек зэIущIэм хэтхэм зэрызахуигъазэ тхыгъэм. Абы щыжыIат Къэбэрдей-Балъкъэрым ис лъэпкъхэм зэи зэращымыгъупщэнур ди къэралым и пщIэр зыхъумахэр, абыхэм я лIыгъэр нобэрей щIэблэм я щапхъэу зэрыщытыр. КIуэкIуэ Казбек къыхигъэщащ дяпэкIи республикэр зэрыхущIэкъунур афган зауэм пхыкIахэм яхуэсакъыным.
КПРФ-м и Къэбэрдей-Балъкъэр щIыналъэ къудамэм и республикэ комитетым и япэ секретарь Пащты Борис КъБР-м и Парламентым и депутатхэм къабгъэдэкIыу къэпсэлъащ. Абы къыхигъэщащ афган зауэм хэтахэм я лIыгъэм пщIэ зэрыхуэфащэр. Пащтым утыкум щыжиIащ КъБР-м и Парламентым и ЩIыхь тхылъхэр зратынухэм я цIэ-унэцIэхэр.
КъБР-м и Правительствэм и УнафэщIым и къуэдзэ Къуэшырокъуэ Залым жиIащ Хэку зауэшхуэм хэтахэм хуэдэу, ди зауэлIхэм я хахуагъэр иджы Украинэм щекIуэкI дзэ Iуэху хэхами къызэрыщагъэлъагъуэр. «Афган зауэм хэта дэтхэнэми къэралым къыщищIа къалэныр щIыхь пылъу игъэзэщIащ», - къыхигъэщащ абы. Къуэшырокъуэм КъБР-м и Правительствэм и ЩIыхь тхылъхэр Аф-ган зауэм хэта цIыху зыбжанэм яритащ.
КъБР-м щэнхабзэмкIэ и министрым и къуэдзэ Тау Рити IуэхущIапIэм и ФIыщIэ тхылъхэр яритыжащ лIыхъужьхэм.
КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор къызэхуэсахэм яжриIащ курыт школым къыщыдеджа щIалэ куэд Афган зауэм зэрыхэкIуэдар. «Иджыпстуи жэуаплыныгъэшхуэ фохь, ди щIэблэр гъэсэным теухуауэ. Абы щхьэкIэ фIыщIэ фхудощI», - захуигъэзащ абы лIыхъужьхэм. Министрым IуэхущIапIэм къыбгъэдэкI дамыгъэхэмкIэ игъэлъэпIащ цIыху зыбжанэ.
ЛIыхъужьхэм псалъэ гуапэкIэ зыхуагъэзащ КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим, КъБР-м егъэджэныгъэмрэ щIэныгъэмкIэ и министр Езауэ Анзор, нэгъуэщIхэми.
ХьэщIэхэм папщIэ ята концертым хэтащ «Кабардинка», «Балкария» къэфакIуэ ансамблхэр, «Город N» гупыр, Адыгэ Республикэм щIыхь зиIэ и артист ДыщэкI Артур, КъБР-м щIыхь зиIэ и артист ЦокIыл Азэмэт сымэ.
БАГЪЭТЫР Луизэ.
Сурэтхэр
Къарей Элинэ трихащ.
