«Сириус» урысейпсо ныбжьыщIэ центрым иджыблагъэ щызэхуащIыжащ ещанэ егъэджэныгъэ программэр. «Къыхуеджэныгъэ ин» фIэщыгъэр зиIэу екIуэкIа программэм и «МатериалыщIэхэр» унэтIыныгъэмкIэ екIуэкIа зэпеуэр къызэригъэпэщащ «Жырымрэ гъущI зэхэжыхьахэмкIэ Москва дэт институт» Лъэпкъ къэхутакIуэ техникэ университетым (НИТУ «МИСиС»). ЕджапIэм и пресс-IэнатIэм хъыбар къызэритамкIэ, абы и проектыр ехъулIэныгъэкIэ щызыгъэлъэ­гъуахэм ящыщщ Къэбэрдей-Балъкъэрым щыпсэу школакIуэ КIуащ Алинэ.
Псори зэхэту къапщтэмэ, НИТУ «МИСиС»-м и IэщIагъэлIхэмрэ егъэджакIуэхэмрэ яубзыхуа унэтIыныгъэм УФ-м и щIыналъэ зэмылIэужьыгъуэхэм къикIа ныбжьыщIэ 30 щызэпеуащ. Абыхэм утыку ирахьащ зэлэжьа проекти 6. Мэлбахъуэ Тимборэ и цIэр зэрихьэу Тэрч къалэм дэт курыт школ №3-м и 10-нэ классым щIэс КIуащ Алинэ зыхэхуа гупым адыгэ пщащэм и гъусэу хэтащ Москва щыщхэу Дюжиков Максимрэ Иванов Никитэрэ, Новгород Ищхъэрэ областым къикIауэ Семериков Виктор, Новосибирск щIыналъэм щыпсэу Меняйлов Дмитрий сымэ. А ныбжьыщIэхэр елэжьащ гъущIыкIэ зэмы­лIэу­жьыгъуэхэр зэхэбгъэткIухькIэрэ электрокъа­рур зэхуэзыхьэс Iэмэпсымэ къэгупсысыным.
Ди гуапэ зэрыхъущи, Алинэ зыхэта къэхутакIуэ гупым утыку ирахьа проектым гулъытэ щыхуащIащ, щытхъуи щыхужаIащ «Сириус» центрми НИТУ «МИСиС»-м и IэщIагъэлIхэми. НыбжьыщIэхэр университетым и лабораторэхэм ирагъэблэгъащ, я проектхэм адэкIэ щелэжьын щхьэкIэ. Апхуэдэу ахэр хэтынущ Урысей щIэныгъэм и махуэм и щIыхькIэ 2020 гъэм и гъатхэм Москва щызэхашэну щIэныгъэ-практикэ конференцым. Апхуэдэуи Алинэ сымэ Iэмал яIэщ я къэхутэныгъэ проектыр конференцым щащIа докладхэр зэрытыну щIэныгъэ журналым традзэну.
Зи япэ къэхутэныгъэхэр лъагэу къалъыта адыгэ пщащэм дохъуэхъу ди щIыналъэм и цIэр фIыкIэ зыгъэIун ехъулIэныгъэщIэхэр дяпэкIи зыIэригъэхьэну, курыт школыр фIы дыдэу къиухыу и мурадхэр зригъэхъулIэну.