Былтыр октябрьда республиканы чеклеринде тюрлениуле болгъандыла, аланы санындан ариу табийгъат жерлени талайы кетерилгендиле. Болсада, Россейни бла Гюржюню чеклерине жууукълашханда, ала Баш Кавказ хребетни тёппелери бла ётедиле, алайда барыргъа эркинлик берген къагъытла, инсанны ким болгъанына шагъатлыкъ этген документ да изленирикдиле, деп билдиредиле республиканы Курортла эм туризм министерствосундан.
Пропускланы бла эркинлик къагъытланы Россейни гражданлары - 15, тыш къыралланы келечилери уа 30 ишчи кюнню ичинде алаллыкъдыла. Аны ючюн заявленияны почтаны бёлюмюнде, ФСБ-ны Чекчи управлениясында энчи приёмда (аны адреси: 360024, КъМР, Нальчик, Къабарты орам, 192-чи мекям), управленияны электрон почтасына - pu.kbr@fsb.ru, къырал эм муниципал жумушланы бир порталында - http://gosuslugi.ru берирге боллукъду. Толу информацияны управлениягъа барып неда 8-8662-481857 телефон бла сёлешип алыргъа жарарыкъды. Документлени болжаллары заявление эсепге алыннган кюнден башланадыла, почта бла жиберилген заман саналмайды. Чекчи органланы келечилери, къоркъуусузлукъну сакълар муратда, бу жерледе баргъан адамланы документлерин сураргъа, транспортларына да къараргъа боллукъдула.

Элбрус районда Хотютаугъа, Хасан къой сюрген жерге, Чегет таугъа Донгуз-орун кёлге, Когутайны тёппелерине, Жашил къонакъ юй жерге, Башкарин кёлге, «Шхельданы ышарыуу» жагъагъа, Адыр-Суу ауушда муратла айтхан тала бла ташха эм талай башха жерге барыргъа энчи къагъыт керек тюйюлдю. Чегем районда Абай-Суу чучхурлагъа, Голубевни эм Донкинни ауушларына, Чегемни гара сууларына, Шаурту чыраннга; Черек районда Уштулугъа (гара суула, ышыкъ эм къонакъ юйле), Къара суу бла Чайнашки эм Тютюн суулагъа, Кривосивцек ауушха, Гийбаш кёлге, Думалагъа  жолла да тыйгъычсыздыла. Бызынгы ауузда Шыкъыгъа, Уллу чыранны Баранкош кёлге дери кесегине, Мижиргичиран, Хрум къол, Дыхтау таугъа да чурумсуз барыллыкъды. «Шхельда», «Джантуугъан», «Джайлыкъ», «Уллу-Тау», «Башиль», «Чегем», «Безенги» альпинист лагерьле, «Приэльбрусье» пансионат бла «Эльбрус» юйретиу-методика ара да чекчи жерлеге кирмейдиле.
Кульчаланы Зульфия.