Мэзкуу къалэм и «Лужники» куейм самбэмкIэ щыIэ дунейпсо центрым иджыблагъэ щекIуэкIащ дзюдомкIэ «ЛокоДзюдо-2023» урысейпсо зэхьэзэхуэм и кIэух зэпеуэр. Абы хэтащ республикэм и «Локомотив» командэр икIи медалитху абы къыщихьащ.

Я хьэлъагъ елъытауэ щыбэна гупхэм я деж япэ увыпIэр ­щаубыдащ Джэданэ Алинэрэ (кг 40) Унэж Амирланрэ (кг 34-рэ). Ещанэ хъуахэщ Абазэ Сэлим (кг 38-рэ), Шыгъэлыгъуэ Аскэр (кг 42-рэ), Караев Алим (кг 46-рэ) сымэ. 
Зэхьэзэхуэм кърикIуахэр зэхалъхьэжа нэужь, 2010 - 2011 гъэхэм къалъхуахэм ирагъэкIуэкIа зэпеуэм хэтахэм ящыщу дзюдоист ­нэхъыфIу къалъытащ Джэданэ Алинэрэ Унэж Амирланрэ. ЩIыхь тхылъхэмрэ дыщэ медалхэмрэ къадэкIуэу чемпионхэр ахъшэ ­саугъэтхэмкIэ ягъэпажащ икIи щхьэж къылъысу сом мини 100 къызэрыратам щыхьэт техъуэ сертификатхэри къыIэщIалъхьащ. 
Спортсменхэр зэхьэзэхуэм хуагъэхьэзыращ Джэданэ Залымрэ Лукьянов Геннадийрэ.