КъБР-м и Парламентым и УнафэщI Егоровэ Татьянэ зи чэзу зэIущIэр иригъэкIуэкIащ. Абы депутатхэр щыхэ­плъащ республикэм и законопроект зыбжанэм.

«Къэбэрдей-Балъкъэр Республикэм дыкъэзыухъуреихь дунейр зэрыщахъу­мэм теухуауэ» КъБР-м и Законым зэ­-­хъуэкIы­ныгъэхэр хэлъхьэным и IуэхукIэ» КъБР-м и законым и проектыр абыхэм язщ.
ЗэIущIэм щытепсэлъыхьащ «Псыр къы­зэрагъэсэбэпымрэ зэрахъумэмрэ ехьэлIауэ» КъБР и Законым и 3-нэ, 5-нэ Iыхьэхэм зэхъуэкIыныгъэхэр хэлъхьэным и IуэхукIэ» КъБР-м и законым и проектым.
КъБР-м и Парламентым Мэкъумэш IуэхухэмкIэ, щIыуэпсыр къэгъэсэбэ­пы­нымкIэ, экологиемрэ дыкъэзыухъуреихь дунейр хъумэнымкIэ и комитетым и унафэщI ТекIушэ Артур къызэрыхигъэщамкIэ, законопроектыр зэхагъэуващ 2023 гъэм дыгъэгъазэм и 25-м къыдагъэкIа, «Урысей Федерацэм и законода­тельнэ акт щхьэхуэхэмрэ и ЩIы кодек­сымрэ зэхъуэкIыныгъэхэр хэлъхьэным ­теухуауэ» Федеральнэ Закон №657-р къызэращтам ипкъ иткIэ. Ар зыхуэгъэзар псыхэр къы­зэрагъэсэбэпымрэ зэрахъу­мэм­рэ ехьэлIа лэжьыгъэхэр зэрырагъэ­фIэкIуэнырщ. 
- Абы къыщыгъэлъэгъуащ законым и 3-нэ статьям и Iыхьэ 2-м и пункт 9-м, псым цIыхухэм я шынагъуэншагъэм зэры­щы­кIэлъыплъ щIыкIэу КъБР-м и Прави­тельст­вэм зэриубзыхур къыщыхьам, къару имы­Iэжу къэлъытэныр, - жиIащ къэпсэ­лъам.
Законхэм я проектхэр зыхуэгъэза IэнатIэхэм хуагъэхьащ, зыщагъэгъуэзэн, ды­щIагъужын папщIэ. Ахэр халъхьэжмэ, Iуэхур зи нэIэм щIэт комитетхэм дэфтэрхэм хэплъэну КъБР-м и Парламентым и зэIущIэм къыщыхалъхьэнущ. 
Депутатхэр тепсэлъыхьащ къэралым и нэгъуэщI щIыналъэхэм къабгъэдэкI федеральнэ законхэм я проектхэмрэ жэрдэмхэмрэ. Гулъытэ зыхуащIахэм ящыщщ УФ-м хьэры­чэтыщIэхэмрэ IуэхущIапIэ­хэмрэ къызэ­рыщыхатхыкIым, сабийхэр хъыбар ­мы­хъумыщIэхэм зэрыщахъумэм, бжьэ гъэ­хъу­ным, псыщIэгъэлъадэхэм зегъэубгъуным, туризм Iуэхум зегъэужьы­ным. Апхуэдэуи федеральнэ законхэм я про­ектхэр теухуат УФ-м и Мэз, ЩIы кодексхэм зэхъуэкIыныгъэхэр хэлъхьэным.
Депутатхэм къыхалъхьащ Урысейм щIэныгъэхэмкIэ и академиер къызэры­зэрагъэпэщрэ илъэс 300 щрикъум ирихьэлIэу КъБР-м и Парламентым и ЩIыхь тхылъкIэ РАН-м и Къэбэрдей-Балъкъэр щIэныгъэ центрым и лэжьакIуэ зыбжанэ ягъэлъэпIэну.

КъБР-м и Парламентым и пресс-IуэхущIапIэ.