Налшык къалэм Къалэн куэд щагъэзащIэ и щIалэгъуалэ центрым щIышылэм и 26-м щытепсэлъыхьащ Сабийхэмрэ щIалэгъуалэмрэ папщIэ къызэрагъэпэща «Пэрытхэм я зэщIэхъееныгъэ» урысей зэгухьэныгъэм зэфIигъэкIамрэ къыдэкIуэтей щIэблэр гъэсэным абы хуищI хэлъхьэныгъэр зыхуэдэмрэ.
ЗэIущIэр къызэрагъэпэщащ КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым, КъБР-м Егъэджэныгъэмрэ щIэныгъэмкIэ, ЩIалэгъуалэм я IуэхухэмкIэ и министерствэхэм. Абы хэтащ КъБР-м и Парламентым и УнафэщIым и къуэдзэ Жанатаев Сэлим, ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и унафэщI Емуз Нинэ, КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м щIалэгъуалэм я IуэхухэмкIэ и министр Лу Азэмэт, егъэджэныгъэ IэнатIэм и лIыкIуэхэр, школ унафэщIхэр, районхэм я щIыпIэ администрацэхэм я лэжьакIуэхэр, нэгъуэщIхэри.
ЗэIущIэр къыщызэIуихым, КъБР-м и Парламентым и УнафэщIым и къуэдзэ Жанатаев Сэлим жиIащ къаIэта Iуэхум щытепсэлъыхьыну къыхаха IуэхущIапIэм псом ипэ къихуэу зэрызыщаплъыхьар икIи абы щIалэгъуалэм зэрызыщаужьыну, я къэухьым зэрыщыхагъэхъуэну Iэмал псори къыщызэрагъэпэщауэ къызэрилъытэр.
- Шэч къытесхьэркъым Къалэн куэд щагъэзащIэ мы центрым къекIуалIэхэм я зэфIэкIым мыбдеж зэрыщыхагъэхъуэфынум, цIыхум яхэтынымкIэ сэбэп ар зэрахуэхъунум, - къыхигъэщащ къэпсэлъам. - ЩIалэгъуалэр жылагъуэ лэжьыгъэхэм жыджэру хэтмэ, Iуэхугъуэ зэхуэмыдэхэм теухуауэ я проектхэр ягъэхьэзырыфу загъасэмэ ди щIыналъэм, къэралым я къэкIуэнум хуэщхьэпэнущ. Ахэр щапхъэ яхуэхъун хуейщ яужь ит нэхъыщIэхэми. «Пэрытхэм я зэщIэхъееныгъэ» щIалэгъуалэ зэгухьэныгъэм щыпхагъэкI Iуэхухэм я лъабжьэ хъун хуейр хэкупсэ гъэсэныгъэрщ, зы гупсысэм лъэпкъхэр зэрызэкъуигъэувэнырщ. СызэреплъымкIэ, IуэхущIапIэм зыхуигъэувыж къалэнхэр игъэзэщIэфынущ, лэжьыгъэм хэзыщIыкIхэр абы щызэщIэгъэуIуащи.
- Гъэсэныгъэр цIыхубэ шынагъуэншагъэм и лъабжьэщ. Нобэрей зэIущIэм къедгъэблэгъахэр мы Iуэхум фIыуэ хэзыщIыкI икIи елэжь IэщIагъэлIхэращ. «Пэрытхэм я зэщIэхъееныгъэ» IуэхущIапIэм и лэжьыгъэр зэрызэтриублэрэ куэд мыщIами, икъукIэ мыхьэнэшхуэ зэриIэр наIуэ къэхъуащ. Нобэ дыхуейт лэжьыгъэр къэзылъэхъэнкIэ хъуну щыIэхэм зэIухауэ дытепсэлъыхьыну, адэкIэ дызэрызэдэлэжьэнур наIуэ къэтщIыну, - жиIащ Емуз Нинэ.
«Пэрытхэм я зэщIэхъееныгъэ» урысейпсо щIалэгъуалэ зэгухьэныгъэм и щIыналъэ къудамэм и советым и унафэщI Шыпш Аслъэн видеоролик зэхагъэувам тепсэлъыхьурэ къызэхуэсахэр щигъэгъуэзащ IуэхущIапIэр къызэрызэрагъэпэща щIыкIэмрэ илъэсым и кIуэцIкIэ зэфIагъэкIамрэ. Абы зэрыжиIамкIэ, зэгухьэныгъэм и къудамэхэр республикэ псом къыщызэIуахащ, школхэм, курыт щIэныгъэ щратхэм, еджапIэ нэхъыщхьэхэм щIэсхэр къызэщIаубыдэу. Мы зэманым зэщIэхъееныгъэм Къэбэрдей-Балъкъэрым и щIалэгъуалэ мин 17-м щIигъу хэтщ.
- Зэгухьэныгъэм и мурад нэхъыщхьэр къыдэкIуэтей щIэблэм я зэфIэкIхэр зыхуаунэтIынур ягъэбелджылынымкIэ дэIэпыкъуэгъу дахуэхъун зэрыхуейрщ. А Iуэхум ехьэлIауэ зыхуэдгъэувыж къалэнхэр къыдэхъулIэнымкIэ щIэгъэкъуэныфI, дауи, къытхуохъу министерствэхэри. Нэхъыбэу ди лэжьыгъэр курыт школхэм зэрыщекIуэкIыр къэплъытэмэ, адэкIэ дыхуейт адэ-анэхэми нэхъ жыджэру дадэлэжьэну, дызэрыщIэу зы Iуэхум ди къарур тедухуэну, - жиIащ Шыпшым.
Бахъсэн районым и щIыпIэ администрацэм и Iэтащхьэм и япэ къуэдзэ Оганезовэ ФатIимэт тепсэлъыхьащ «Пэрытхэм я зэщIэхъееныгъэм» и лэжьыгъэр зэраунэтIым, а Iуэхум хэтхэр пэшхэмрэ техникэхэмкIэ къызэрызэрагъэпэщам. Апхуэдэуи абы къыхигъэщащ зэгухьэныгъэм и IуэхущIафэхэм щIалэгъуалэр дихьэхыу зэрыхэтыр.
ЗэщIэхъееныгъэм зэрызиужьынум теухуауэ я Iуэху еплъыкIэхэр зэIущIэм къыщагъэлъагъуащ Налшык къалэм дэт гимназие №14-м и унафэщI Жамборэ Риммэ, Налшык къалэм дэт курыт школ №6-м и унафэщI Текуев Аслъэн, «Навигаторы детства» урысейпсо ресурс центрым и Къэбэрдей-Балъкъэр щIыналъэ къудамэм и унафэщI Кулимовэ Залинэ, а IуэхущIапIэм и лэжьыгъэр Тэрч районым щызэзыгъэуIу, Урысей сабий-ныбжьыщIэ центрым и IэщIагъэлI пажэ Шэрыб Людмилэ, «Пэрытхэм я зэщIэхъееныгъэ» зэгухьэныгъэм зи сабий хэзыгъэхьа Суановэ Залинэ сымэ.
БАГЪЭТЫР Луизэ.
Сурэтыр Къарей Элинэ трихащ.
