Сейирлик жумушладан толу сагъатла, кюнле.

Къабарты-Малкъар къырал университетде къуралгъан жай лагерь къууанчлы халда жабылгъанды. Анга аталгъан жыйылыу башланырны аллында, сабийле, бир бирлерине ал бермей, лагерьде болгъан кюнлерини юсюнден ата-аналарына, башха жууукъларына да хапар айтадыла.
«Биз мында кёп зат билгенбиз, кёпню кёргенбиз. Сиз а Ботанический садда болгъанмысыз? Анда алай ариуду, бир къадар терек, юлкю, гюл ёседи… Алгъын къыралыбызны башчысыны дачасына да баргъанбыз. Сиз а ол къайда болгъанын билемисиз? Бизге уа анда болгъан кёп затны да юсюнден хапар айтып, кёргюзтгендиле. Алгъын анда бункерле эмда жер тюбюнде юйле, жолла болгъандыла, ала урушну кезиуюнде бугъар ючюн ишленнгендиле. Бусагъатда уа жабылып турадыла.
Анда оранжерея да барды, ананасла ёседиле. Сиз а ала къалай ёсгенлерин бир заманда иш кёргенмисиз? Биз а кёргенбиз! Дагъыда - шинжили  чабакъны, башха жаныуарчыкъланы да. Ала къургъакъсытылыпдыла. Къара чертлеуюк болгъанын да анда билгенбиз. Оюнланы уа къаллай бирин ойнагъанбыз! "Сарыуэк", "Мафия", "Бояула", "Бузулгъан телефон"...»
Сабийле алай эте тургъанлай, макъам эшитиледи. Лагерьчиле, аланы ата, аналары, ынналары да бир жерге жыйыладыла. Андан сора "Super Stars" эмда "Queen" отрядла кеслерини чакъырыуларын айтхандыла, ингилиз тилде жырлагъандыла, назмула окъугъандыла, сахна оюн кёргюзтгендиле.
Быйылгъы смен "Акъыллыла, гиртчиле, уста къоллула. Биз бек игиле!" деген чакъырыу бла бардырылгъанды. Сабийле керти да кёп билгенлерин, кёп затха юйреннгенлерин ортагъа чыгъып кёргюзтгендиле. Ызы бла уа хычыуун жумуш тамамланнганды. Лагерьде тургъан 38 жашха бла къызгъа ингилиз тилден курсланы ётгенлерине сертификатла берилгендиле, информатикадан проектлени конкурсунда хорлагъанла уа дипломла къоллу болгъандыла. Холаланы Хажи-Мурат ингилиз тилни билиуде жетишимлери ючюн энчи саугъа бла белгиленнгенди.
Лагерьчиледен бири, КъМКъУ-ну "Каллисто" ансамблини кичи къауумуна кирген Ульяна Красильникова, тепсеп, Аурика Кунашева уа, "Мени Къабарты-Малкъарым" деген жырны айтып, жыйылгъанланы ыразы этгендиле. Ахырында уа сабийле бары да бирден устазларына, юйретиучюлерине да: «Сау болугъуз, биз сизни унутмакъ! Сау къал, лагерь! Биз бери энтта къайтырыкъбыз!»,- дегендиле. Тюбешиуню ахырында лагерьни къурагъанла, жашланы бла къызланы, ары келген къонакъланы да мороженое бла сыйлагъандыла.

Холаланы Марзият.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.