Дунияны тёрт кере чемпиону Прохладнадан женгил атлетчи Мария Ласицкене (Кучина) Россейни женгил атлетикадан жай чемпионатында алтын майдалны алгъанды.
Эришиу Чебоксарыде «Олимпийский» стадионда ётгенди, анга къыралны 72 регионундан эм кючлю атлетчиле къатышхандыла. Мария, эки метр бийикликге секирип, башха спортчулагъа аны озаргъа амал къоймагъанды. 26-жыллыкъ атлетчи быйыл 9 даражалы россейли эм халкъла аралы эришиулеге къатышханды эм барысындан да хорламла бла къайтханды, ол санда «Бриллиант лигадан» да. Спорт бла кюрешип башлагъанлы аны тренер Геннадий Габрилян юйретеди.
Къыралны чемпионатында къытханындан сора уа Кучина, россейли спортчуладан биринчи болуп, 1433 очко жыйып, женгил атлетикадан дуния рейтингге башчылыкъ этеди. Экинчи жерни анда кениячы Беатрис Чепкоэч (1426 очко) алады, ючюнчюню уа – голландиячы Сифан Хассан (1424 очко).