КъМР-ни Эл мюлк министерствосундан билдиргенлерине кёре, быйыл республиканы сабанчылары мирзеулюк битимлени эмда къудоруну кёп къалмай 70 минг гектарда ёсдюргендиле. Ол санда 40 минг чакълы бирни кюзлюк будай, 6,4 минг гектарны уа кюзлюк арпа аладыла.
Тирликни жыйыу бу кюнледе къыстау барады. 80 процентинде (53,4 минг гектар) аны оруп бошагъандыла. Ол санда кюзлюк будайны – 92 процентин. Аны тирликлилиги да игиди - бир гектарда 39 центнер ёсдюрюрге къолдан келгенди. Ол а былтырдан 8,3 процентге асламды.
Кюзлюк арпаны жыйыу да аз-аздан ахырына жетдириле турады. Ол озгъан жылдан эсе 12,5 процентге кёп болуп, арендаторланы бютюнда къууандырады. Андан бир гектардан 36 центнер алынады.
Эртте жетген картофну юсюнден айтханда, аны ёсдюрюуде эллиле былтыр жетишимлирек болгъанлары кёрюнеди. Нек дегенде быйыл аны тирликлилиги, сегиз процентге азайып, жаланда 208 центнерди. Къалай-алай болса да, бу кюнлеге 3,2 минг гектардан 66,5 минг тонна картоф жыйылгъанды.
Тахта кёгетчиле да тири къармашыудадыла. Хар чууакъ кюнню хайырлана, ала 5,5 минг гектар чакълы жерледен кёп къалмай 53 минг тонна продукция алгъандыла. Былтырны эсеплерине къарагъанда, быйыл аллай бир жерде 4,6 процентге аслам кёгет ёсдюрюлгенин белгилейдиле министерствону специалистлери.
