Казбек Коков ЖКХ-гъа аталгъан «контроль сагъатны» кезиуюнде Правительствону башчылары эмда муниципал къуралыуланы таматалары бла юйлени жылытыучу кезиуге хазырланыу къалай баргъанын, республиканы эллерин бла шахарларын суу бла чырмаусуз жалчытыуну амалларын да сюзгенди. Аны юсюнден билдириуле бла КъМР-ни Правительствосуну Председателини орунбасары - инфраструктураны бла цифралы айныуну министри Владимир Болотоков, районланы бла шахарланы администрацияларыны башчылары сёлешгендиле.
Тийишли мадарла этиу бла, деп белгиленнгенди кенгешде, бир-бир муниципал къуралыулада суу къытлыкъдан къутулургъа къолдан келгенди. Быйылны башындан бери республикада инженер инфраструктураны, тозурагъан суу быргъыланы 26 километрден артыгъын алышындырыу эмда тынгылы ремонт этиу бардырылгъанды. Тёрт скважина жангыдан ишлеп башларча этилгенди, 48-си уа игилендирилгендиле. Аллай ишле бусагъатда да бардырыладыла.
Суу бла жалчытыу бла болум Атажукино, Заюково, Огъары Куркужин элледе эмда Бахсан, Чегем шахарланы жангы микрорайонларында, Экинчи Чегемде, Каменкада, Яникойда артыкъда осалды. Бюгюнлюкде муниципалитетле «Таза суу» миллет проектге суу бла жалчытхан объектлени къошууну мадарларын этедиле. Бир-бир проектлени документациялары хазырдыла.
Республиканы оноучусу, бу жумуш уллу да, магъаналы да болгъанын эсгертип, Правительствогъа район администрациялагъа аны тамамларгъа себеплик этерге буюргъанды. Бу ишни терк тындырыргъа кереклисин чертип, анга дайым кёз-къулакъ болургъа, жамауатны тарыгъыуларына эс бурургъа эмда алагъа кёре тийишли мадарла этерге кереклисин къаты эсгертгенди.
Социал объектлени бла жашау журтланы жылытыучу кезиуге хазырланыуну юсюнден айта, республиканы оноучусу ол жаны бла битеу ишлени тохташдырылгъан заманнга бошаргъа деп аллай борч салгъанды. «Эки ай къалгъанды, ол себепден ишни тирилтирге, битеу керекли мадарла этерге, кемчиликлери болгъан участкаланы тинтирге, къысхасы, бир тюрлю чырмау чыкъмазча этерге керекди»,-дегенди Казбек Коков.
