Жангы жылгъа кёп къалмагъанды. Аны бла байламлы жамауат байрамгъа къазауатда хазырланады.  Къабарты-Малкъарда   назы терекчикле сатхан ярмаркаланы да ишлери къыстауду.  
Быйыл Нальчикде назы терекле сатхан жети ярмарка ишлейди: Абхазия майданда, «Кавказ», «Юго-Западный» сатыу-алыу комплекслени алларында, «Чора» спорт араны бла ипподромну арбазларында эм башха жерледе. Ала айны ахырына дери сатыу этерикдиле. 
Эсге сала айтсакъ, Нальчик шахар округну  администрациясы жамауатха таплыкъгъа,  Абхазия майданда ярмарканы бу жол  байрым эм шабат кюнледе ётдюрюрге эркин этгенди.  Келир жыл а ярмарка 13 январьда ачыллыкъды. 
Россельхознадзорну Шимал Кавказда регионла аралы управлениясыны сайтында  билдирилгенича, республикада назы терекле ёсдюрген питомникле болгъанына да къарамай, аланы иги кесеги тыш регионладан  келтириледиле.  
Кёп болмай ведомствону келечилери  битимлени фитосанитар  болумлары бла шагъырейленир хыйсапда рейд бардыргъандыла. 
Специалистле айтханнга кёре, назыны алырдан алгъа сатыучудан тийишли документлени сураргъа керекди.  Ол кёп хатадан сакъларгъа боллукъду. Терекчик кёп кюнлени къууандырыр ючюн, аны  тюрсюнюне – бутакъларыны эм ийисине –  энчи эс бурулса игиди.