Искусстволаны Шимал-Кавказ къырал институтунда «Бизни Баш законубуз» деген ат бла «тёгерек стол» ётгенди. Аны «Патриот» жамауат биригиу  «Тарыхны эсде тутуу» проектни чеклеринде Россей Федерацияны Конституциясыны 30-жыллыгъына жоралап бардыргъанды. 
«Тёгерек столну» кезиуюнде Институтну тамата курсларыны студентлери   Марина Карабугаева, Байрамукъланы Милена, Милана Хузорокова, Датчиланы Жаннет, Амина Лагодугова  докладла этгендиле. Хар бири да РФ-ни Конституциясыны, аны магъаналылыгъыны, россейлилени законлу эркинликлерин, къыралны сейирлерин къалай къоруулагъаныны, къыралны  бирлигин, жалынчакъсыз сакълаугъа не юлюш къошханын туура этгендиле.
Жыйылыуну философия илмуланы доктору Эфендиланы Фуад эмда тарых илмуланы кандидаты Мадина Кулова къурагъандыла. Ала да Конституцияда жазылгъан затланы хар ким да билирге, миллетлени бирликлерин бютюн кючлендирирге, Ата журтубузну келир заманы, аны айныуу ючюн жууаплылыкъны сезерге кереклисин   айырып айтхандыла.

Люба Адилова.