КъМР-ни Парламентини башчысы Татьяна Егорова «Муратланы назы тереги» акцияны чеклеринде жашланы бла къызланы тилеклерин толтургъанды.

Татьяна Борисовна аланы законла чыгъарыучу органнга чакъырып, Жангы жыл бла алгъышлагъанды эмда келир заманнга муратларыны юслеринден соргъанды.
 Шагъырейлениу жетижыллыкъ Таймураздан башланнганды. Ол саугъаны кеси сайларгъа сюйгенди. Аны ючюн жашха «Детский мир» тюкенни сертификаты берилгенди. 
Парламентни къонакъларындан бири Уллу Ата журт урушну ветераны Максим Ожереданы туудугъу Артур болгъанды. Ол а Жангы жылда Парламентде болургъа, аны башчысы бла танышыргъа сюйгенин жазгъанды.
- Максим Алексеевич Ожередагъа келир жыл 105 жыл толлукъду. Мен анда къонакъда болгъанма, ол сейир адамды. Артур насыплыды – аны аллай батыр къарт аппасы барды, андан къазауатны юсюнден керти хапар билирге боллукъду.  Сиз да Ата журтубузну тарыхын, Хорламны багъасын билсегиз сюебиз. Артур, жигит къарт аппасыны атын бийикде жюрют, тенглеринге ол айтхан хапарланы билдир,-дегенди Татьяна Егорова.
Онжыллыкъ Артур сурат ишлерге, жырларгъа, назмула айтыргъа сюеди. Татьяна Борисовна анга эсде къаллыкъ саугъа бергенди. 
Энтта бир къонакъ – Даниял – Нальчикни 5-чи школунда окъуйду. Татьяна Егорова кеси да аны бошагъанды.   
- Анда аламат устазла бардыла. Сени амманг да математикадан устазды.  Сен иги окъугъанынгы, алим болургъа сюейгенинги да билеме. Сен алыкъа экинчи классха жюрюйсе, алай школну бошагъынчы къуру «беш» белгилеге окъуругъунгу тежейме. Бу саугъа уа санга ол жаны бла себеплик этер деп ийнанама,-дегенди спикер.
Онбиржыллыкъ Фатима уа «Муратланы назы тереги» акцияны чеклеринде былтыр Парламентде болгъанын эсгергенди Татьяна Егорова. Былтырча, къызчыкъ косметика тилегенди. Ол, ёссе, визажист усталыкъ бла кюреширге сюеди. Къызчыкъ муратларын алышмагъаны фахмусуну, ышаннгылылыгъыны белгиси болгъанын чертгенди спикер.
Онекижыллыкъ Амир баскетбол бла кюрешеди, мураты да спорт бла байламлыды. Жаш топ бла форма тилегенди. Татьяна Егорова ол бюгюннге дери да жетишимле болдургъанын билгенин айтып, мындан ары да хорламла тежегенди. 
Онбешжыллыкъ Иван а смарт-сагъатла сюйгенин жазгъан эди «Муратланы назы терегине». Парламентни башчысы Приближный элде Иван тургъан интернатда болгъанын айтханды эмда саугъа аны къууандырлыгъына ышаннганды.  
Татьяна Егорова жаш къонакълагъа саулукъ, келир заманда усталыкъны тюз сайларларын эмда муратлары толурларын тежегенди. 
Сабийле да къууаннганларын букъдурмай, саугъала ючюн ыразылыкъларын айтхандыла. 
Къонакъланы Парламентни мекямы эмда иши бла  шагъырей этгендиле. Ахырында ала бирге суратха тюшгендиле.
КъМР-ни Парламентини 
пресс-службасы.