СССР къэрал абрагъуэр электрификацэ щIынымкIэ Къэрал комиссэм, «ГОЭЛРО-м и план» цIэр иIэу, 1920 гъэм зэхилъхьауэ щыта экономикэ программэм мыхьэнэшхуэ ­игъэзэщIащ. 

Ауэ щыхъукIи, тхыдэм фIы и лъэныкъуэкIэ къыхэна, ЦIыхубэ хозяйствэм зэрызиужьынум и япэ къэрал план зэхэтыр къы­зэращтэрэ мы гъэм илъэсищэрэ щырэ ирокъу.
Электроэнергетикэм ди гъащIэм къалэнышхуэхэр щегъэ­защIэ. Сыту жыпIэмэ, жылагъуэ экономикэр зыхуэдэнур абы       и щытыкIэм, и зыужьыкIэм къыгуэхыпIэ имыIэу епхащ. 
Дыщыпсэу республикэр къэтщтэнщи, Кавказ Ищхъэрэм и МРСК IуэхущIапIэм и Къэбэрдей-Балъкъэр къудамэм ди щIыналъэм токыр ятрегуашэ, псэуалъэхэм яхупещIэ, къэзыгъэ­сэбэпхэр ирикъуу къызэгъэпэщыным пыщIа Iуэхугъуэ псори мы зэманым гъэхуауэ йокIуэкI. Абы къищынэмыщIауэ, токыр зэрыIуач, зэрыIуадзэ, къэхъукъащIэхэм зэрыщахъумэ, зэрыт­раухуэ-зэрызэпащIэ Iэмэпсымэхэр зэпэщщ. Дызыхыхьа щIымахуэ лъэхъэнэм электросетхэр къызыхуэтыншэу хуагъэ­хьэ­зыращи, щыщIагъэ ин къахукъуэмыкIыу лэжьэнущ. 
Киловольти 110-04-м хуэщIа уэгу кIапсэу километр мин 18-м щIигъу, псори зэхэту мегаватти 130-м нэблагъэ зи лъэщагъ, киловольти 120-м щIигъу зэкIуалIэ подстанцу 90-м щIигъу, ки­ловольти 6-10/0,4 щагуэш трансформатор пункту 2300-м нэблагъэ къагъэсэбэп. Иужьрей илъэсхэм ди щIыналъэм электростанцыщIэхэр къызэрыщыунэхуар сэбэпышхуэ хъуащ токыр къэзыгъэсэбэпхэм ар къызыхуэтыншэу лъагъэIэсы­нымкIэ. 
Дызэрыщыгъуазэщи, иужьрей илъэсхэм Къэбэрдей-Балъкъэрым щIэгъэхуэбжьауэ щызэтеуващ «Шэрэдж-Ищхъэрэ» ГЭС-м и ухуэныгъэщIэхэр. 2024 гъэм къриубыдэу, респуб­ликэм и энергетикхэм я мурадщ абыхэм нэхъ хуэищхъэрэ дыдэу яхэт Псыгуэнсу МГЭС-м, мегаватт 19,1-м нэблагъэ зи лъэщагъыу щытынум, и лэжьыгъэр къызыхуэтыншэу зэтрауб­лэну. 
Мы Iуэхум пыщIа цIыху гуащIафIэхэм, IэнатIэм и ветеранхэм дохъуэхъу мамыр гъащIэ яIэну, я щхьэкIи я унагъуэкIи узыншэну!
 КЪУМАХУЭ  Аслъэн.