Кёп болмай КъМР-ни Терроризмге къажау комиссиясыны бла Оператив штабыны кенгешинде Жангы жылны бла Рождествону байрам кюнлеринде къоркъуусузлукъну жалчытыуну мадарлары сюзюлгендиле, деп билдиргендиле КъМР-ни Башчысыны бла Правительствосуну пресс-службасындан.
Быйыл аслам адам къатышхан уллу байрамла ётерик тюйюлдюле. Болсада билим бериу организациялада, сабий садлада назы терекле жасаллыкъдыла, утренникле бардырыллыкъдыла. Ол себепден аллай жерледе къошакъ халда къайгъырыу изленеди.
Андан сора да, белгилисича, келир жыл мартда РФ-ни Президентин айырыула боллукъдула. Ол тынгылы толтурулургъа керекли даражалы жумушду. Аны бла байламлы КъМР-ни Башчысы Казбек Коков Терроризмге къажау комиссияны бла Оператив штабны келечилерине, республиканы толтуруучу власть органларына, муниципал къуралыулагъа айырыула баргъан кезиуде къоркъуусузлукъну жалчытыу, айырыу участокланы террорчулукъ ишледен къоруулау, инсанланы айырыу эркинликлерине бузукълукъла болдурмау жаны бла мадарла этерге буюргъанды.
Жыйылыуда дагъыда КъМР-ни Терроризмге къажау комиссиясыны быйыл ишини толу болмагъан эсеплери чыгъарылгъандыла. РФ-ни терроризмге къажау мадарланы комплекс планы къалай толгъанына къаралгъанды. «2024 жылда терроризмни жолун кесер ючюн бизге бек кёп жумуш тамамларгъа, битеу болгъан онгларыбызны хайырланыргъа тюшерикди. Магъаналы политика ишлени, байрам, маданият эм спорт мадарланы кезиуюнде, бек алгъа уа къыралны Президентин айырыулада къоркъуусузлукъну жалчытыу баш борчларыбыздан бири болгъанлай къалады»,- деп чертгенди Казбек Коков.
