Дон Iус Ростов къалэм Лышх узыфэхэмкIэ и щIэныгъэ-медицинэ IуэхущIапIэм и дохутырхэм иджыблагъэ робот-операцэ хуащIащ Луганск ЦIыхубэ Республикэм щыщ пенсионерым.
Илъэс 65-рэ зи ныбжь цIыхухъум щахэ лышх къыпкърыхьауэ къахутат. Узыфэр 2-нэ лIэужьыгъуэм нэсати, операцэр сэбэп хъуну дохутырхэм щыжаIэм, Луганск къикIри, Ростов къэкIуащ. ИкIи IуэхущIапIэм и онкоуро-логхэм я Iэмэпсымэ лъэщхэмкIэ операцэ телъыджэ хуащIащ сымаджэм.
- НобэкIэ щIэныгъэр здынэсам тещIыхьауэ дунейм нэхъ Iэмэпсымэ лъэщ дыдэу тетхэр диIэщ, - жеIэ лышх узыфэхэмкIэ щIэныгъэ-медицинэ IуэхущIапIэм и унафэщI профессор Кит Олег. - Абы къыхэкIыу, щахэ лышхым ебэнынымкIэ ехъулIэныгъэфIхэр къыдогъэлъагъуэ. Узым къыщIидзагъащIэмэ, брахитерапиекIэ доIэзэ сымаджэм е роботкIэ операцэ дощI. Луганск къикIа цIыхухъум и ныбжьымрэ къефыкI лышх лIэужьыгъуэмрэ зэпэтшэчри, роботкIэ операцэ тщIыну тедухуат. Къыхэгъэщыпхъэщ иужьрей зэманым ди IуэхущIапIэм роботхэр куэду къызэрыщыдгъэсэбэпыр. Сыту жыпIэмэ, цIыхур зэгуэдмыгъэжу, лъы куэд фIэмыкIуэду, узышхуи имышэчу зэфIокI, псынщIэуи зэфIоувэж.
«Узыншагъэ» лъэпкъ Iуэхум и фIыгъэщ Дон Iус Ростов къалэм Лышх узыфэхэмкIэ и щIэныгъэ-медицинэ IуэхущIапIэм робот-хирург къызэрищэхуфар. АбыкIэ дохутырхэм хуиту операцэ ящI зи тхьэмбылыр, лъатэр, кIэтIийр, гъутхьэпсылъэр, лъхуалъэр, лъхуадэхэр, щахэр лышхым иубыда сымаджэхэр.
- Робот-хирургыр уэздыгъэ нэхукIэ, сурэттехкIэ, дызыхуэныкъуэнкIэ хъуну Iэмэпсымэ псомкIи къызэгъэпэщащи, сымаджэр зэгуэгъэжауэ ущхьэщытым хуэдэу, хуиту операцэ уощIыф, ауэ куэдрэ кIыж, хьэлъэу къеуз уIэгъэшхуэхэр пщIыкъым, уеблэмэ операцэ нэхъ хьэлъэ дыдэу къалъытэхэр пхуогъэкIуэкI. Мы лIым къеуэлIа лышхыр зэрыщыту къыхэдгъэжащ, абы уз лей химыхыу, сэкъат имыгъуэту къызэтенащ, - къыхегъэщ онкоурологие къудамэм и унафэщI, профессор Шевченкэ Алексей.
Фырэ Анфисэ.
